Предыдущая публикация
Һеҙҙе Дәүләт байрамы - Республика көнө менән ҡотлайбыҙ!
1990 йылдың 11 октяберендә Республикабыҙ үҙ аллы - Суверенлы тип иғлан ителде һәм Башҡортостан Республикаһы тигән исем алды.
Донъла төрлө илдәр бар. Бер ил үҙенең тауҙары, бер ил үҙенең далалары, өсөнсөһө һыуҙары, дүртенсеһе урмандары менән дан тота. Ә Башҡортостан шуларҙың барыһы менән дә мәшһүр…
Урал… был исемде әйтеү менән, күҙ алдына әкиәт батшаһының алтын һарайына оҡшаған бейек ҡаялар, иге-сиге булмаған урмандар, таштан ташҡа һикереп аҡҡан һалҡын шишмәләр, сәскәле аҡландар, таҫма-таҫма булып һуҙылған тау юлдары килеп баҫа.
Урал… унан көс алып, урау-урау юлдар үтеп, беҙҙең данлыҡлы Ағиҙелебеҙ, тынғыһыҙ, етеҙ Ҡариҙелебеҙ киң далаларға ашыға.
Уралдың йөрәгенә күҙ һалайыҡ. Ниндәй генә хазиналар юҡ унда! Алтын һәм баҡыр, тимер һәм аҫыл таштар, нефть һәм күмер…
Шуларҙың бөтәһе лә беҙҙең Башҡортостаныбыҙ бит. ( М.Кәрим)
Республикабыҙҙың майҙаны – 143,6 мең кв.км, халҡы 3943113 кеше. Бөтәһе 54 район, 21 ҡала, 41 тибындағы ҡасаба, 4674 ауыл бар.
Башҡортостан территорияһын эреле-ваҡлы 600 йылға бүлгәләй, 1000-дән ашыу күл бар. Башҡортостандағы йылғалар – Ағиҙел, Ҡариҙел, Дим, Инйәр, Һаҡмар, Ашҡаҙар, Әй, Йүрүҙән, Таналыҡ, Сөн. Башҡортостандағы күлдәр – Асылыкүл, Ҡандракүл, Яҡтыкүл, Талҡаҫ. Башҡортостандағы тауҙар – Ямантау, Ирәмәл, Ҡараташ.
Башҡортостан – беҙҙең тыуған төйәгебеҙ. Башҡортостан – башҡорт иле тигән һүҙ. Бында борон-борондан башҡорттар йәшәгән һәм йәшәй. Башҡорттар – киң күңелле халыҡ. Улар электән үҙ ерҙәрендә урыҫтарҙы, татарҙарҙы, сыуаштарҙы, удмурттарҙы, мариҙарҙы һәм башҡа халыҡтарҙы һыйындырған. Уларҙың бөтәһе менән дә дуҫ йәшәй.
БАШҠОРТ ИЛЕ
Ҡайҙа - аҙан, һыуҙа - һаҙан,
Усаҡтарҙа ҡайнай ҡаҙан -
Шунда - башҡорт.
Йөҙө - нурлы, иле - муллы,
… Табынында бисмиллалы
Һыйлы аш-ҡот.
Иманым тип, ил-ғәмем тип
Ҡанын ҡойған, йәнен ҡыйған -
Аҙаны шул,
Йәйрәп ятҡан тау-далаһын
Иңләп аҡҡан йылғаларҙың
Һаҙаны мул.
Ни мосафир изге уйҙан
Тупһабыҙҙан аша уҙһа -
Ҡаҙан әҙер,
Бабаларҙан шул рәүештә
Йәшәргә тип, эшләргә тип
Ҡалған нәҙер.
Донъяларҙа беҙ юғалған
Ҡәүем түгел, әүен түгел -
Кәмһенмәйбеҙ,
Сит малына, байлығына,
Әллә кемдең ер-һыуына
Ымһынмайбыҙ.
Шөкөр, тибеҙ: тулы - ҡаҙан,
Һыуҙа - һаҙан, моңло - аҙан,
Ныҡлы биле;
Иман сәсһен, дуҫ күбәйтһен,
Торған ерен ожмах итһен
Башҡорт иле
© Гүзәл Ситдиҡова
БАШҠОРТОСТАН ФЛАГЫ
Башҡортостан флагында
Күк, аҡ, йәшел төҫ уйнай.
Зәңгәр күктә талпына ул,
Аҫыл ҡош ҡанатылай.
Күк төҫ – изгелек билдәһе,
Аҡ төҫ – именлек, сафлыҡ.
Йәшел – йәшәү мәңгелеге,
Татыулыҡ һәм азатлыҡ.
Ҡурай сәскәһенең тажы
Дуҫлыҡты һынландыра.
Гел татыу йәшәгән халыҡ
Ерҙә ныҡ баҫып тора.
Республикамдың флагы
Елберләп саңҡығандай:
“Имен, шат, бәхетле булып
Йәшәгеҙ бер туғандай!”
(Ә.Әсәҙуллина)
Барығыҙҙы ла төп Дәүләт байрамы – Республика көнө менән ихлас ҡотлайбыҙ! Сәскә атһын Республикабыҙ! Илебеҙҙә һәр ваҡыт тыныслыҡ булһын! Барығыҙға ла ныҡлы сәләмәтлек һәм именлек, тыныслыҡ һәм татыулыҡ, бәхет һәм һәр изге эшегеҙҙә уңыштар теләйбеҙ!
Следующая публикация
Комментарии 1