Предыдущая публикация
Хасел т1аде щванин т1аг1унге гьудул,
Т1урач1ел анищаз гьикъулей йигин.
Т1огьол завал анин унге, йокьулей,
Рокьул г1арзабазул г1адлу гьабе цин.
Дидани кколаан, рокьул махсаро,
Мех гьоркьоб арабго к1очон телилан.
К1арчамаб гьимиялъ гьалаг гьабураб
Гьава заман ингун г1одоб буссинин.
Сверана замана, араб нилъер их
Хасалил бусада бихьула макьилъ.
Мун дие гьимараб маялъул сордо,
Соназда бахъизе к1веч1о рек1елъа.
Гьаб ракьалда щибго- заманалъул лагъ,
Зобазда гъоркь г1умру- г1иц1го цо лах1зат.
Заманго щвелалде щапизе тоге,
Щобда дуца ч1вараб дир рокьул байрахъ.
Хасел т1аде щванин т1аг1унге, гьудул,
Т1адюссун яч1ине кват1изе гурин.
Т1огьол завал анин унге, йокьулей,
Унго, дуй бицине бугебщинаб жо!
Следующая публикация
Комментарии 2