Нав-ниҳол қиз соябонини нозик қўлларида тутганча эшикни қулфлади-да, кўп қаватли бинодан туша бошлади.
— Мунис!
Янграган овоз кимникилигини пайқаган қиз дарров ортига ўгирилди. Сўнгги русумдаги машинадан тушган Санжар Муниса томон кела бошлади.
— Салом, — деди Муниса Санжарнинг юзига қарамасликка уриниб.
— Саломни, яхши қиз, тўлиқ бериш керак, — деди Санжар мийиғида кулиб қўяркан Мунисадан синчков нигоҳини узмай.
— Сиз чет мамлакатларда ўқиб, яшаб келганингиз учун…
— Инсон Ер куррасини айланиб чиқса ҳам, ўзлигини йўқотмаслиги керак.
— Унда, ассалому алайкум, — деди қиз бироз зарда билан. — Энди кетаверайми?
— Ва алайкум ассало-о-ом! — Санжарнинг кайфияти нима учундир кўтарилиб кетганди. — Йўқ, ҳеч қаерга ёлғиз кетмайсан, ўзим ташлаб қўяман…
— Йўқ, йўқ! — деди Муниса ҳаяжонини яширолмай. — Ўзим кетаман. Сиз мени уйим олдида кутишни бас қилинг.
— Кутганим йўқ, шунчаки…
— Кутмасангиз яна яхши, хайр!
— Шошма, Мунис…
Санжарнинг гапи доимгидек чала қолди. Беш йил давомида ўзга юртларда ҳам ўқиб, ҳам ишлаб келган Санжар эндиликда ўзи учун рисоладагидек рафиқа бўла оладиган қиз қидираётганди. Бунинг учун бир маҳаллада катта бўлган Мунисани энг яхши номзод деб билган Санжар оиласи гарчи бошқа ерга кўчиб кетган бўлса ҳам, гоҳ уни, гоҳ буни баҳона қилиб, эски маҳалласига қатнайверарди.
Санжар уйидаги меҳмонларни кўриб ажабланмади. Меҳмондорчиликни хуш кўрадиган онаси дугоналарию танишларини уйига чақириб чарчамасди. Санжар онасининг бу одати ҳамон ўзгармагани учун жилмайган кўйи бош чайқади-да, кетишга шайланган меҳмонлар билан саломлашди.
— Ҳ-ҳалиги, бу эса менинг қизим Сара! — ўзини таништириб бўлган аёл ёнидаги сариқ сочли қизга ишора қилди.
— Сара? — ажабланди Санжар ва ҳазилкашлик билан аёлга гап қотди. — Нима инглизга турмушга чиққанмисиз?
— Қани энди! — узун тирноқли бармоқлари билан қизил лабларини беркитиб кулди аёл. — Йўқ, биз шунчаки қизимизни эркалаб шундай деймиз. Асл исми эса Сарвиноз.
— Шундай чиройли исми бор экан-ку, аллақандай Сарага бало борми. Ҳа, майли, танишганимдан хурсандман Сарвинозхон.
Фикрини дангал айтишга одатланган Санжар ўз хонаси тарафга ўтиб кетди.
— Хўш, қалай? — деди меҳмонларини кузатиб, ўғли ёнига ўтирган аёл терилган қошларини учириб.
— Аҳволимми? Дуруст…
— Э-э, қизни айтяпман, — деди аёл ёшига ярашмаган аллақандай эркалик билан. — Санжар, шу қиз билан бир учрашиб кўр. Дугонам жуда бой, орзу-ҳавасли…
— Э, ҳа-а-а, — деди Санжар онасига яқинроқ келиб куларкан. — Ҳали улар совчилармиди? Бу дейман, беш йил ичида замонавийлашиб кетибмиз-ку, а? Энди қизлар йигитларникига келишяптими?
— Сенга ҳазил бўлса, ахир чиройли қиз-ку!
— Ойи, — Санжар ўрнидан туриб, жиддий тортди. — Бундай кўғирчоқлардан бир умрлик умр йўлдош чиқармиди? Очиғини айтсам, жуда ҳурлиқо қиз қидирмаяпман. Оддийгина, лекин ҳақиқий бўлсин. Мен бироз ухлаб олай, кейинроқ гаплашамиз.
Эски маҳалласига дўстларини кўргани борган Санжар Мунисани кўрдию, қизни ёқтириб қолди. Қайси дўстидан суриштирмасин, бари Мунисани мақтар, фақат оғир шароити унга тўғри келмаслигини айтишарди. «Нима, мен келин бўлиб тушармидим, шароитининг менга даҳли йўқ», дерди дўстларига Санжар. Дастлаб Мунисанинг кўнглини топишни ва кейин онасини қизнинг уйига юборишни ўйлаб юрган Санжар бу ишни тезроқ ҳал қилишга қарор қилди.
— Сен билан гаплашиб олишим зарур, бунча мендан қочмасанг, — деди Санжар кунларнинг бирида Мунисанинг йўлидан чиқиб.
— Яхши, гапиринг!
— Қизиқсан-да, Мунис, — кулиб қўйди Санжар. — Бунча шошаверасан-а? Катта одамлардек бирор жойда ўтириб, муҳокама қилинадиган жиддий мавзу бор.
Муниса бироз ўйланиб турди-да, розилик берди. Санжар қизни шинам ресторанга олиб кирди. Қиз эса негадир қимтиниб ўтирарди.
— Бемалол ўтирсанг-чи, Мунис, — деди Санжар ва таомномани очди. — Нима еймиз, қорним жуда оч…
— Йўқ, мен ҳеч нарса емайман, — деди Муниса уялиб.
Қиз гарчи эрталабдан буён туз тотмаганига қарамай барча таклифларни рад этди, аммо Санжарнинг қистови туфайли таомномани очиб, бирор таом танлашга мажбур бўлди. Муниса таомлар қаршисида ёзилган нархларни кўраркан, кўзлари катта очилиб кетди ва энг арзон салатни танлади.
— Мени ўт-ўлан билан алдамоқчимисан, дейман? — Санжар кўтаринки кайфиятда кўз қисиб қўйди. — Сен гўштли таомлардан кўп-кўп ейишинг керак, нимжонлигингни қара. Айтгандай, овқат пиширишни биласанми?
— Ҳа.
— Менинг рафиқам яхши уй бекаси бўлиши керак. Аслида, кўчада овқатланишни ёқтирмайман. Уйда меҳр билан тайёрланган таомга нима етсин, шундай эмасми?
— Тўғри.
— Биласанми, Мунис? — деди суҳбатга берилиб кетган Санжар. — Менинг рафиқам учун оила биринчи ўринда туриши керак.
— Сизнинг рафиқангизга менинг нима даҳлим бор? Умуман, нега менга бундай саволларни беряпсиз?
— Билиб турибсан-ку негалигини, — мамнун жилмайди Санжар ва костюмидан кичик қутича чиқариб, қиз томонга узатди. — Менга турмушга чиқ!
— Н-нима?!
— Биламан, дабдурустдан қабул қилишинг қийин, лекин ўйлаб кўр, — деди Санжар бироз ҳаяжон билан. Йигит ҳайратда қолган қизга тикилиб, қўлларини икки томонга ёйди. — Ёки сен ҳам қандайдир катта даврада гуллар ва гўзал манзара оғушида тиз чўкиб, қўлингни сўрашларини кутганмидинг?! Шуни истасанг, бу муаммо эмас. Шунчаки, мен бундай жимжималардан йироқ одамман-да…
Муниса индамади.
Қиздан тайинли жавоб ололмаган Санжар кун бўйи тушкун кайфиятда юрди. Қолаверса, у катталарнинг қароридан ҳам ташвишда эди. Отасини-ку рози қилади, аммо ҳар нарсани бойлик ва обрў билан ўлчашга ўрганиб қолган онаси муаммо. Уйда ўтиролмай яна эски маҳалласи томон шошилган Санжар йўлда дўстини учратиб қолди ва ундан маслаҳат сўрагандек ёрилди.
— Бадавлат йигит оддий, лекин мағрур қизни севиб қолади ва улар бирга бўлолмай ажралиб кетишади! — деди овозига тантанали руҳ бериб гапирган дўсти кулиб.
— Майнабозчиликни йиғиштир. Гапларинг ҳам ўзинг каби совуқ, — деди Санжар жилмайишга уриниб. — Ундан кўра муаммо ечимини айт.
— Сени биламан, Санжар, бир қарорга келдингми, узоқ ўйламай шартта ҳал қиласан. Қиз сенга ёқди, у ҳам сени ёқтиради, назаримда. Совчи қўй ва уйлан. Онангни кўндиришга келсак, бир ғайрат қиласан-да энди…
Санжар дўсти айтгандек йўл тутиб, Мунисага совчи қўйди ва икки ойга қолмай тўй бўлди. Муниса учун янгича ҳаёт эшиклари очилган, у ўзини бу ҳаёт узра бегонадек ҳис этар, қайнонаси билан тил топишолмай овора, фақат Санжаргина унинг кўзларини алангалатарди.
— Ниҳоят! — деди Муниса эрининг машинаси келганини кўриб, ҳовли томон шошиб чиқаркан. — Ниҳоят, келдингизми… Ҳ-ҳалиги, ассалому алайкум.
— Ва алайкум ассалом. Гар саломинг бўлмаса, икки ямлаб бир ютардим! — деди Санжар рафиқасининг бурнини чимдиб, ҳазил қиларкан.
Шу пайт ҳозиргина ёпилган дарвоза қайта очилиб, қизил рангдаги машина кирди ва ундан бир қиз тушиб, Санжар томон шўх табассум билан яқинлаша бошлади.
— Салом, Санжар! Бир оғиз гапингиз билан учиб келавердим, — деди қиз ва Санжарнинг икки юзидан ўпиб қўйди.
— Ие, Сарвиноз, жуда зўр иш бўлибди-да!
— Албатта! — шаддодлик билан кўз қисиб қўйган қиз Мунисага бир қаради-да, қўлидаги пакетларни унга тутқазди. — Буларни меҳмонхонага олиб кир.
Сарвиноз Санжар билан қўлтиқлашиб ичкарига кираркан, Муниса уларнинг ортидан қараб қотиб қолганди.
— Ҳой, қиз, совғаларни берсанг-чи, ҳой! — Сарвиноз Санжар ва унинг онасига қараб кулишдан тўхтамасди. — Нима бало, қулоғи оғирроқми дейман?
— Бу бизнинг келин, — деди норози қиёфада базўр гап бошлаган қайнона. — Хизматчи эмас.
— Ие, — ўрнидан туриб, Мунисага яқинлашди Сарвиноз. — Ҳали бу мен турганда танланган ўша машҳур келинми?
— Н-нима? — дея қошлари билинар-билинмас чимирилган Муниса Санжарга қараб қўйди.
— Ҳазиллашдим, жоним! — шарақлаб кулган Сарвиноз Мунисанинг икки юзидан ўпиб кўришди ва қизнинг қўлидаги пакетдан бежирим қутичани олди. — Тўйга келолмаганим учун танимабман, узр. Бу мендан сизга совға…
Муниса то эри билан ёлғиз қолгунча ич-этини еди. У Сарвинознинг эркин ҳаракатларидан, қайнонасининг менсимай боқишларидан ва айниқса, эрининг қилиғидан асабийлашарди.
— Уни меҳмонга сиз чақирганингиз ростми?!
— Ҳа, ойимнинг яқин дугонасининг қизи. Биргаликда бир яйрашсин…
— Сиз билан қадрдонлардек кўришди, — Муниса эрига тик қарамасди-ю, уни ўғринча кузатарди.
— Мунис! — деди Санжар бошини ортга ташлаб куларкан. — Мен у билан бор-йўғи икки, ана бор, уч марта кўришганман. Баъзан қўнғироқ қилиб туриши ҳам рост. Сен Сервинознинг гапларига кўп ҳам аҳамият берма.
Санжарнинг айтган гаплари Мунисанинг кўнглига таскин беролмас, Сарвиноз эса икки-уч кун деб келганига қарамай, бир ҳафтадан бери шу уйда яшаётганди. Қизнинг ҳадеб кулавериши, ўзини жуда эркин тутиб, истаган гапни гапиравериши Мунисага эриш туюлар, эри нима учун бу қизни таклиф қилгани ҳақидаги ўй тинчлик бермасди.
— Сара, бу кийиминг жуда очиқ-ку! — деди зиёфатга кетиш олдидан қайнонаси.
— Холажон, — кулишга уринган Сарвиноз Мунисага ишора қилди. — Мен мана бундай рўдапо кийимларга ўрганмаганман.
— Бошқасини кий, Сара, сен менга омонатсан. Онангга…
— Онамнинг ўзи ҳам шундай кийинади у ерларда, — бурнини жийириб гапиришга тушган қиз индамайгина бир четда кулиб турган Санжарга қаради. — Ана Санжарга кўйлагим жуда ёқди, кулишини қаранг. Жуда ёқимтой ўғлингиз бор-да.
— Ёққанда-чи!
Муниса эрининг маъноли қарашларини тушунмас, «Ёққанда-чи» деган гапидан ғазаби қайнаб кетганди. Муниса эгнидаги сипо, лекин нафис кўйлакка қараб олди-да, хонасига киришга чоғланди.
— Мунис, кеч қоламиз, кетдик, — деди эри Мунисани тўхтатиб.
— Ҳозир бошқа кўйлак кийиб чиқай…
— Эҳ, ўзимнинг соддагинам, сен энг чиройлисисан. Қани, кетдик.
Муниса Санжарни тушунолмасди. Эри Сарвиноз билан исталган мавзуда гаплашиб ўтирарди. Баъзан жим бўлиб жилмайган кўйи онаси билан Сарвинознинг кун сайин авжланаётган баҳсларини кузатарди, холос.
Дастлабки кунлар дугонасининг қизини ўз қизидек суяётган аёл энди уни ёқтирмас, аксинча, келини билан бир мунча илиқ суҳбатлашадиган бўлиб қолди.
— Бугун клубга бормаймизми, Мунис? — деди тирноқларини бўяётган Сарвиноз. — Сизга раҳмим келади, кун бўйи уйдасиз.
— Қанақа клуб? — ҳайратланган Муниса кўзларини катта очиб эри ва қайнонасига қаради.
— Дискотекага! — деди Сарвиноз чуқур «уф» тортиб. — Нима бало, ҳеч бормаганмисиз?
Муниса эрига кўз ташлади. Санжар доимгидай жилмайганча жим ўтирар, гоҳ онасига, гоҳ Сарвинозга синчковлик билан боқарди.
— Эсинг жойидами, Сарвиноз?! — чидолмай гапга аралашди қайнонаси. — Муниса дискотекада нима қилади?
— Холажон, ёмон жой эмас-ку. Шунчаки, одамлар рақс тушадиган…
— Йўқ, йўқ! — ўрнидан туриб, овозини асабий баландлатди аёл. — Менинг келиним ундай жойларга бормайди! Сен борсанг, боравер!
— Оббо! — деди Сарвиноз ҳам ўрнидан даст туриб. — Жуда жонга тегдингиз-да! Мен сизни замонавий аёл десам, ўрта асрларда қолиб кетган экансиз-ку. Яхшиси, уйимга кета қолай, бу ерда зерикдим. Санжар менга чипта буюртма қил.
Санжар ҳолатини ўзгартирмай, «Хўп» деди-да, ҳуштак чалиб, кўчага чиқиб кетди.
* * *
Қишнинг совуқ кунларида уйига кириб келган Санжар онаси ва Мунисага тайёрланишларини, театрга чипта олиб келганини айтди. Ўзига оро бериб ўтирган аёл кўтаринки кайфиятда «Ёшларга халақит бермай. Ўзингиз бориб келинг», деди-да дугоналари билан учрашувга шошилди. Муниса ҳам бурнини жийирди.
— Ҳеч қаерга бормайман. Анави Сарани чақиринг, бирга клубга борасиз, — сохта араз қилди келинчак эрига қарамай.
— Мана шу соддалигинг ўзингга ярашади-да, Мунис. Ойим у билан қайнона-келиндек яшолмаслигини тушунсин ва сенинг қадрингга етсин, деб атайин таклиф қилгандим-да, жиннивой. Қани, олдимга туш энди…
Ёшлар йўл-йўлакай ўтган воқеаларни муҳокама қилишаркан, кулгидан ўзларини тийишолмас, бахтдан эса кўзлари ёнарди!
Присоединяйтесь к ОК, чтобы подписаться на группу и комментировать публикации.
Комментарии 1