Г1алг1айче

ГІалгІайче Лоамий мехка хозагІа дола дакъа ДІа а лаьца улл хьо, ГІалгІайче, Курра йолаш никъ хьо хьай дІахо Дуне мел латт яха хьо, ГІалгІайче. АллахI — Даьла, низ ба ГІалгІайченна, Везан — Даьла, йоахае ГІалгІайче. Лаьтта даттІал йоккха я човнаш, МоастагІаша хьа дегІа яьраш. Эздий хилба хьа керахьа къонгаш, ЧІир леха, бохабе гІаьраш. АллахI — Даьла, низ ба ГІалгІайченна, ЧІир леха низ ба ГІалгІайченна. Дунен чухьа лехаргьяц атто, Деза вайна хьагI йоаца вахар. Лаьтта оахаш дахаргда лаьтта, Низ кхоаче из лаьтта аха. АллахI — Даьла, низ ба ГІалгІайченна, Лаьтта аха низ ба ГІалгІайченна. Бокъонга сатувс хьа уйлаша, Дог, тов мо, леталу хьа чІоагІа Тха Даьхе, хьо массаза хийла Кортамукъа, дех Даь

Наьха дико г1оза ца воаккхар Хургвац ший диках доккхал де ховш. Наха эшача оарца ца доаккхар Хургвац во деча отта нах болаш. Наха дикаш дечун хул вахар г1оза, Х1аьта, валар хул нах т1ехьа белхаш. Цун кодам бе воаг1а вовзар ца вовзар, Из мел вийзар шоашца вахаш. Вочун таьзет д1адода миска, Цунна ду г1улакх — саг1ийна лу сискал. 《Плиев Амир》

Са никъ ба б1аьшерашка нах иха, Поэзен хала никъ, уйлаш т1аувз цо массахана. Вусаргвий-те со цу т1а, кхийна цун ма1ан лаха? Е вовргва-те, ваьга, к1ур бу т1аьда хаьшка санна? Е эри т1аяьнна йоарх1 санна хеташ, Д1аттетаргда-те са муг1араш вай т1ехьено? Е дусаргда-те уж, малх ца кхеташ, Д1а т1а ца эцаш мах ховча таханено? Аз-м дог дахац, доккхий хиш санна, Сай тоатол Дуненна д1адовзар. Сона эш лоаман ц1ена хьаст санна, Чам мел баьккхачунна из дезар. 《Плиев Амир》

Ираз хилда хьа. Хьай т1ехьено велаволва хьо. Хьа во ма гулда сона. Хье везарий безами, цавезарий ловри ма далда хьох. Дикаца дукха вахалва хьо. Ираз-аьттув хилба хьа. Ц1ена т1ехье **** хьа. Эзар хилва хьох. 1айха леледечох беркат хилда хьона. Дага доацача вонах лораваь, дага доацача диках кхеволва хьо. Даьла раьза хилва хьона. Даьла дикахи адамий безамахи ма валва хьо. Ди довзаш вахалва. Б1аргаго хозали, лерга хаза дика кхаъи ц1аккха ма эшалда хьона. Сабари, ирази, сатеми хилба хьоца. Д1аденначох саг1еи, дисачох беркати хилда. Хьай дагара дезал хилба хьа. Дезало велаволва хьо. Беркат ма эшалда шоана. Сага уйланца дага а лаьца, метто д1аала йиш мел йола, сакхетамо къоабал мел даь дика хилд

ИРАЗ Ма ираз да Х1ара денна Дошо малх г1отталга, Ший сийна беркат Сигалено Са къамарга чу дотталга. Ма ираз да Г1амг1ай зиза, Кхесташ, Белаж т1а хувшалга. Ма ираз да Йоккха Даьхе 31амигача дег чу ховшалга. Ма ираз да Бела ховш Гонахьарчарна, Сона а Вела ховргдацар в1алла, Бела ца ховре царна. Ма ираз да сона зелуш Гонахьарбарий г1айг1а, аьттув… Ма ираз да Са бокъо йолаш Дукхадеза деррига лаьтта! 《Гагиев Гирихан》

Даьхенга Даьхе-хьо я б1аьсти, Зизаш даьста йоаг1а ха. Даьхе,хьо да кхаьча эсти, Бос-бесара лега г1а Даьхе-хьо ялатий дозал, Сийна седкъий лувча хий… Даьхе,Даьхе… Хьо са хоза, Хьо са г1оза г1а ма дий! Маьлха лоамаш,лакха г1алаш, Шедар дега хоза хет. Хьа хозленаша са бала, Са халонаш юхатетт. Хьо йоландаь,аз,ца леткъаш, Сайга кхаьча хало лов… Са б1аргага тов хьа седкъа, Хьа седкъага са б1арг тов! 《Гагиев Гирихан》

Са рузкъа. Са рузкъа-нах ба Кхыдола рузкъа лехаш вац Наьха б1аргашка лувчаргвар со, Дийнахьеи буссеи… Со воацаш бисаб аьнна, Наьха х1ама довргдац, Са-м деррига довргда, Нах боацаш вусе. 《Гагиев Гирихан》