КУГАРНЯ газет

КУГЕЧЕ ПОДКОГЫЛЬО Кугече – марий калыкын ик эн йӧратыме пайремже. Тиде кечын, эрдене эр кынелын, озавате-влак мелнам кӱэштыныт, шушо руаш дене кугече подкогыльым ыштеныт. Мыят тудым ышташ тунемым. Ешна «Семейные традиции» Российысе акцийын «Традиционная кухня» номинацийыштыже «Кугече когыльым ыштымаш» мастер-классым эртарен. Тудо пеш оҥай, пайдале лие. Ме, ӱдыр-влак, шушо руашым ышташ тунемна, когыльо кӧргын тӱрлӧ лиймыж нерген пален нална. Кугече когыльын тӱржым тыршен тӱрлышна. Вара, коҥга гыч лукмым вучен шуктен, тамле когыльым кочна. Тиде Когыльо пайрем чылаштлан поро шарнымашым кода, шонем. Варвара МИХАЙЛОВА, 4-ше класс. Шернур район, Кукнур. #всейсемьей #всейсемьей12

ЖУРНАЛИСТ лияш шонет - тол "БАУМАНСКИЙ" лицейыш Эше ик гана шижтарена: Йошкар-Олаште верланыше "Бауманский" лицей (ондакысе 18-ше N-ан школ) пелен тений шыжым журналист-влак классым чумырат. Тушко уло Республик гыч 10-шо классыш погат. Марий йоча-влакымат вучат. Яра туныктат, илаш верым пуат. Творческий занятий-шамыч газет, журнал, ТВ ден радио редакцийлаште эрташ тӱҥалыт. Тунемаш пураш усталык конкурс лиеш.Чыладам пагален вучена. Йодыш лектеш гын, "Кугарня" газет редакцийыш возен кертыда. Чыла раш умылтарена. Ты лицей - кундемыштына ик эн виян тунемме тӧнеж. Тыште школ деч пасна "Лира" сымыктыш школ, талантан йоча-влаклан "Волгенче" рӱдер, балет школ, чапле бассейн, спортзал, медрӱдер да молат улыт. И.Степанова.

👩🏻‍🏫 26 апрельыште МарГУ-н тӱҥ корпусыштыжо «Идалыкысе эн сай туныктышо», «Идалыкысе эн сай воспитатель», «Марий йылмым эн сайын туныктышо» республикысе конкурс-влакым иктешлыме. Тений тушко 38 туныктышо ушнен, тушеч 14 воспитатель. 🏆Участник-влак икмыняр йыжыҥым эртеныт, тӱрлӧ заданийым шуктеныт. Марий Элысе Образований да науко министр Лариса Ревуцкая сеҥыше-влакым саламлен «Идалыкысе эн сай туныктышо» конкурсышто Семёновка селасе 21-ше №-ан школышто тӱҥалтыш класслам туныктышо Вероника Леонидовна Литвинова сеҥен. «Идалыкысе эн сай воспитатель» конкурсышто Медведево район Руэм посёлкысо «Лесная сказка» йочасадын воспитательже Людмила Алексеевна Басманова палемдалтын. «Марий йылмым эн сайын туныктышо» конкурсышто Курыкмарий район Пайскырык школышто курыкмарий йылмым да литературым туныктышо Наталия Мануиловна Павлова ончыл верым налын. М.Богданова. 📷 И.Речкинын фотожо-влак

🎗️А кызыт Йошкар-Олаште Сеҥымаш парадын черетан репетицийже эрта. Надежда Лаврентьева.

Кызыт Йошкар-Олаште Мер-политик рӱдерыште Марий форум - Шошо сессий тӱҥалын. Тышке 100 наре еҥ толын.

МАРИЙ ТАЛЕШКЕ кече дене, йолташ-влак! Тек Шочмо эл, шочмо кундем, шочмо калык, шке шочмо йылме верч шогышо-влак эре лийыт! Ме шке Талешкына-влакым нигунам огына мондо. Таче эрденак кажне кумылан еҥ, марий талешке-влакын памятникышт, нунылан вераҥдыме мемориал оҥа деке миен, пеледышым пыштен, вуйжым савен. Йошкар-Олаште 7 шагат эрденак рӱж С.Г.Чавайнлан памятник ончыко погынышна.

26 АПРЕЛЬ – МАРИЙ ТАЛЕШКЕ КЕЧЕ 🏹 Марий Оньыжа Эдуард АЛЕКСАНДРОВ саламла: Шергакан марий калыкем! Марий Талешке кече дене алал кумылын саламлем. Кумда тӱняште илыше марий-влак 26 апрельыште Марий талешке кечым палемдат. Тиде кече – Талешкына-влаклан вуйым савыме кече. Тауштена ме нуным чолгалыкыштлан, патырлыкыштлан, вийкуатыштлан. Нунылан кӧра ме, марий-влак, калык семын аралалт кодынна да ош тӱняште шкенан нерген яндар йӱкын ойлена. Ойлена шке шыма, йымыжа марий йылмына дене, ошкыл колтена, ласка южым налын, шке мландыштына. Келшена воктен улшо пошкудо калык дене. Палдарена нуным мемнан йӱлана да тӱвырана дене, жаплена нунын калык поянлыкыштым. Уло чон дене, Юмо деч йодына тӱнялан тыныслыкым да ласкалыкым, марий калыклан вий-куатым. Тек кажне еш тичмаш лиеш, тек кажне чонышто порылык, пиал да тазалык озаланат. Лач тыге марий пашана ончык кая.Изи але кугу сомыл, пашам пырля ыштыза. Изи вӱд кугу эҥерыш ушна, изи паша кугу пашаш савырна. Пырляште ме нугыдемына, пырляште ме вияҥына, пырля ме, рыҥ тошкалын, ончыко каен кертына. Талешке кече дене, марий калыкем!

22 апрель гыч 13 май марте Марий Элыште пожар лӱдыкшӧ лийме шотышто поснак ямде улмо режимым увертарыме да чодыраш пураш чарыме🚷‼. Тиде жапыште тулотым ылыжташ, шӱкым, тӱрлӧ кӱлеш-оккӱл торым, ялозанлыклаште кукшо шудым йӱлалташ пожар лӱдыкшым ыштыше моло сомылым шукташ чарыме🔥. Илыме вер пелен, населённый пунктышто кочкышым кӱкташ лӱмын ёмкостьлаште тулотым ылыжташ чарыме. Еҥ-влаклан шке участкым, пӧрт воктенысе кумдыкым кукшо шудо, шӱк деч эрыктыман. Пожар лӱдыкшыдымылык правилым пудыртымылан штрафым тӱлыктат⚠: населённый пунктышто правилым пудыртымылан еҥ-влаклан 10 гыч 20 тӱжем теҥге марте штрафым тӱлыктат, должностной лица-шамычлан – 30 гыч 60 тӱжем теҥге марте, индивидуальный предприниматель-влаклан – 60-80 тӱжем теҥгем, а юридический лицалан – 600 тӱжем теҥге гыч 1 млн теҥге марте❗.

Кужэҥер посёлкышто Социальный фондын клиент службыштыжо Кугурак тукымын вашмутланыме рӱдерже почылтын. Тидыже кундемыштына визымше тыгай рӱдер. Тышке толшо-влаклан районысо чолга пенсионер-влак шке кидпашаштым выставкыш чумыреныт, районысо тӱвыра пӧртын пашаеҥже-влак изирак концертым ончыктеныт. Россий Социальный фондын Марий Элысе пӧлкаж ден Кужэҥер район администраций пырля пашам ышташ кутырен келшеныт. Рӱдерыште шоҥгыеҥ-влаклан жапым пайдалын эртараш сай йӧным ыштыме: интернетан компьютер, мини-библиотеке, ӱстембал модыш, вашлиймаш ден мастер-классым эртараш пӧлем, медицине лук улыт. Икымше мероприятийымат эртараш палемдыме: тудо Чернобыль АЭС-ыште лийше аварийлан 38 ий теммылан пӧлеклалтеш. Россий Социальный фондын Марий Элысе пӧлкажын фотожо.