КУГАРНЯ газет

🏆11 майыште Морко район Октябрьский посёлкышто корэш кучедалмаш дене таҥасымаш лийын. Тудо военный специальный операцийыште шке порысшым шуктышыла колышо сарзе десантник Денис Александрович Александровым шарныме лӱмеш пӧлеклалтын. Денис Октябрьский школышто тунемын да корэш кучедалмаш дене кужу жап заниматлен. Ты таҥасымашым Октябрьский кыдалаш школ да Марий Элысе корэш федераций кокымшо ий почела эртарат. Тушко Морко, Параньга, Медведево районла да Йошкар-Ола гыч команде-влак ушненыт. Таҥасымаште Денисын родо-тукымжо, пелашыже да кум йочаже лийыныт. Рустам Даминов, Марий Элысе корэш федерацийын председательже.

Кугу Отечественный сар жапыште салтак-влакын героизмыштым, калыкнан пеҥгыдылыкшым пагален шарнен, Йошкар-Оласе вокзал воктенысе площадьыште (тушто постаментыште паровоз шога) торжественный мероприятий лийын. Тушко военный, железнодорожник, пашазе, интеллигенций, самырык тукым, школлаште тунемше-влак ушненыт. Иван Речкин.

Российысе икымше "Курымашлык мотополк", тудым мемнан республикыште ыштыме. Иван Речкин.

КУГЕЧЕ - Канторъялыште Таче Морко район Канторъялыште (Осипсола) КУГЕЧЕ йӱла пайрем эртаралтеш. Тушко Морко, Волжский, Кужэҥер да Советский районла гыч фольклор коллектив-влак погыненыт. "КУГЕЧЕ ӰСТЕЛ" конкурсыш чылан кумылын ушненыт. "ТАШЛАМА КУШТЫМАШ" лийын. Тиде пайрем Морко районлан 100 ияш лӱмгечыже кышкарыште эрта. Ксения Резвыхын фотожо-влак.

12 май. Йошкар-Ола, Чарла кремль, Кугече ярмиҥга. М.Скобелевын фотожо-влак / "Марий Эл" увер агентстве

40 наре тӱрлӧ розам кушта Советский район Ӱшнур селаште илыше Наталья Петрован сад-пакчаштыже 40 наре тӱрлӧ роза кушкеш! Роза веле огыл, моло пеледышат, утларакшым – шукияш. Наталья розам черенкований манме йӧн дене шукемда. Ӱмаште шыжым, мутлан, 200 наре роза вургым мландыш кереден коден. Телым «илен лекше-влакым» тудо атылаш кусарен шында да унала толшо родыжо, йолташыже-шамычлан пӧлекла. А Натальян унаже-влак ик ганат яра огыт тол – эре пеледыш дене.

Еҥлан полшаш эре ямде Йӧратыме пашам ышташ, еҥлан полшаш – кугу пиал, чон ласкалык! Кужэҥер район Шӱдымарий ялын эргыже Алексей Лукоянов медпашаеҥ лиям манын, ик ганат шонен огыл, но илыш ты корнышко шогалтен. Икмыняр ий жапыште тудо тӱрлӧ эмлымверыште пашам ыштен. Ӱмаште март гыч Советский районысо рӱдӧ эмлымвер пеленысе Вашкеполыш станцийыште кугурак фельдшерын ассистентшылан тыршаш тӱҥалын, тыгак аптекыште – фармацевтлан.

АНОНС‼‼ 103 ияш ковалан - чап💥⚡ 🌺Музыковед, В.М.Васильев лӱмеш МарНИИЯЛИ-н научный пашаеҥже Наталья Мушкина (ӱдыр фамилийже – Четкарёва) дене кутырымо годым чӱчкыдынак шке коважым ушештара, тудын чолгалыкшым я марий кумылан улмыжым палдара, примерлан шында. Ойлат, кова ден коча уныкаштым илышлан шукырак туныктат. Очыни, Наталья Валерьевна декат мурым йӧратымаш да пагалымаш Ана коваж деч кусненыт. Вет тений 3 апрельыште 103 ийым темыше кова ӱмыржӧ мучко мурен. Ӱдыржӧ-влакын ойлымышт почеш, пелашыже иктаж-мом кумылдымын пелештен колтен гын, вашешыже Анна Григорьевна чылаж годымат тӧремден моштен, такмакым муралтен, чӱчкыдынак шыргыжалын веселаҥден. Кова тачат моткоч шуко такмакым пала.