Валищане

МАЯ АЙЧЫНА
Мой першы ўздых – мая Айчына –
Палі, балотцы, раўчукі,
Арэшнік, вербалоз, крушына,
Аер балотны, хмызнякі.
Мой першы крок – мая Айчына –
Бары, пагоркі, лазнякі.
Нітуюць з небам далячыняй
Валошкі ў жыце, жаўрукі.
Знікаюць знічкі між лагчынаў,
Спадаюць ў травы-дываны.
Зямля пад зорнымі вачыма,
Світанні, росы, туманы…
Зямля дзядоў маіх спачыну –
На спракавечныя вякі…
Астатні выдых мой – Айчына –
Палі, балотцы, раўчукі.
Марыя Кобец
05.02.2024

РОДНАЯ СТАРОНКА Сцежачка ўздоўж лесу Між збажыны ўецца… Родная старонка… Сэрца гулка б’ецца. Росы ў павуцінках, Бор, балотцы, поле… Родныя мясцінкі. Лёс, жыццё і доля. Коўдрачка з туману... Ціха спаць кладзешся. Прашапчу: “Дабранач!” – Рэхам адгукнецца – Песняй жураўлінай, Клёкатам бусліным, Жыцейкам шумлівым, Борам гаманлівым. Каласком цыбатым Да зямліцы гнецца... Родная старонка… Сэрца б’ецца-б’ецца… М.Кобец