Путié жи́зни укланя́ются от злы́хъ: долготá же житiя́ путié прáведни. Прiéмляй наказáнiе во благи́хъ бýдетъ, храня́й же обличéнiя умудри́тся. И́же храни́тъ своя́ пути́, соблюдáетъ свою́ дýшу: любя́й же живóтъ свóй щади́тъ своя́ устá. Прéжде сокрушéнiя предваря́етъ досаждéнiе, прéжде же падéнiя злопомышлéнiе. Лýчше кроткодýшенъ со смирéнiемъ, нéжели и́же раздѣля́етъ коры́сти съ досади́тельми. Разýмный въ вéщехъ обрѣтáтель благи́хъ, надѣ́яйся же на Гóспода блажéнъ. Премýдрыя и разýмныя злы́ми нари́чутъ, слáдцiи же въ словеси́ мнóжае услы́шани бýдутъ. Истóчникъ живóтенъ рáзумъ стяжáвшымъ, наказáнiе же безýмныхъ злó. Сéрдце премýдраго уразумѣ́етъ я́же от свои́хъ емý ýстъ, во устнáхъ же нóситъ рáзумъ. Сóтове медóвнiи словесá дóбрая, слáдость же и́хъ исцѣлéнiе души́. Сýть путié мня́щiися прáви бы́ти мýжу, обáче послѣ́дняя и́хъ зря́тъ во днó áдово. Мýжъ въ трудѣ́хъ труждáется себѣ́ и изнуждáетъ поги́бель свою́: стропти́вый во свои́хъ устáхъ нóситъ поги́бель. Мýжъ безýменъ копáетъ себѣ́ злáя и во устнáхъ свои́хъ сокрóвищствуетъ óгнь. Мýжъ стропти́вый разсылáетъ злáя, и свѣти́лникъ льсти́ вжигáетъ злы́мъ, и разлучáетъ дрýги. Мýжъ законопрестýпенъ прельщáетъ дрýги и отвóдитъ и́хъ въ пути́ не блáги. Утверждáяй óчи свои́ мы́слитъ развращéнная, грызы́й же устнѣ́ свои́ опредѣля́етъ вся́ злáя: сéй пéщь éсть злóбы. Вѣнéцъ хвалы́ стáрость, на путéхъ же прáвды обрѣтáется. Лýчше мýжъ долготерпѣли́въ пáче крѣ́пкаго, и мýжъ рáзумъ имѣ́яй пáче земледѣ́лца вели́каго: удержавáяй же гнѣ́въ пáче взéмлющаго грáдъ. Въ нѣ́дра вхóдятъ вся́ непрáведнымъ: от Гóспода же вся́ прáведная.
Лýчше укрýхъ хлѣ́ба со слáстiю въ ми́рѣ, нéжели дóмъ испóлненъ мнóгихъ благи́хъ и непрáведныхъ жéртвъ со брáнiю. Рáбъ смы́сленъ обладáетъ влады́ки безýмными, въ брáтiихъ же раздѣли́тъ имѣ́нiе на чáсти. Я́коже искушáется въ пещи́ сребрó и злáто, тáко избрáнная сердцá у Гóспода. Злы́й послýшаетъ язы́ка законопрестýпныхъ, прáведный же не внимáетъ устнáмъ лжи́вымъ. Ругáйся убóгому раздражáетъ сотвóршаго егó, рáдуяйся же о погибáющемъ не обезвини́тся: ми́луяй же поми́лованъ бýдетъ. Вѣнéцъ стáрыхъ чáда чáдъ: похвалá же чáдомъ отцы́ и́хъ. Вѣ́рному вéсь мíръ богáтство, невѣ́рному же нижé пѣ́нязь. Неприли́чны сýть безýмному устнѣ́ вѣ́рны, нижé прáведному устнѣ́ лжи́вы. Мздá благодáтей наказáнiе употребля́ющымъ: и áможе áще обрати́тся, успѣ́етъ. И́же таи́тъ оби́ды, и́щетъ любвé: а и́же ненави́дитъ скрывáти, разлучáетъ дрýги и домáшнiя. Сокрушáетъ прещéнiе сéрдце мýдраго: безýмный же бiéмь не чýвствуетъ рáнъ. Прекослóвiя воздви́жетъ вся́къ злы́й: Госпóдь же áнгела неми́лостива пóслетъ нáнь. Впадéтъ попечéнiе мýжу смы́сленну: безýмнiи же размышля́ютъ злáя. И́же воздаéтъ злáя за благáя, не подви́гнутся злáя изъ дóму егó. Влáсть даéтъ словесéмъ начáло прáвды: предводи́телствуетъ же скýдости пря́ и брáнь. И́же сýдитъ прáведнаго непрáведнымъ, непрáведнаго же прáведнымъ, нечи́стъ и мéрзокъ у Гóспода. Вскýю бя́ше имѣ́нiе безýмному? стяжáти бо премýдрости безсéрдый не мóжетъ. И́же высóкъ твори́тъ свóй дóмъ, и́щетъ сокрушéнiя: остроптѣвáяй же учи́тися впадéтъ во злáя. На вся́ко врéмя дрýгъ да бýдетъ тебѣ́, брáтiя же въ нýждахъ полéзни да бýдутъ: сегó бо рáди раждáются.
Присоединяйтесь к ОК, чтобы подписаться на группу и комментировать публикации.
Нет комментариев