На вся́ко врéмя дрýгъ да бýдетъ тебѣ́, брáтiя же въ нýждахъ полéзни да бýдутъ: сегó бо рáди раждáются. Мýжъ безýменъ плéщетъ и рáдуется себѣ́, я́коже поручáяйся испорýчитъ дрýга своегó, на свои́хъ же устнáхъ óгнь сокрóвищствуетъ. Грѣхолю́бецъ рáдуется свáромъ, а жестокосéрдый не усря́щетъ благи́хъ. Мýжъ удобопрелóжный язы́комъ впадéтъ во злáя: сéрдце же безýмнаго болѣ́знь стяжáвшему é. Не весели́тся отéцъ о сы́нѣ ненакáзаннѣмъ: сы́нъ же мýдръ весели́тъ мáтерь свою́. Сéрдце веселя́щеся благоимѣ́тися твори́тъ: мýжу же печáльну засы́шутъ кóсти. Прiéмлющему дáры непрáведно въ нѣ́дра не предуспѣвáютъ путié: нечести́вый же укланя́етъ пути́ прáвды. Лицé разýмно мýжа премýдра, óчи же безýмнаго на концѣ́хъ земли́. Гнѣ́въ отцý сы́нъ безýменъ, и болѣ́знь рóждшей егó. Тщеты́ твори́ти мýжу прáведну не добрó, нижé преподóбно навѣ́товати властéмъ прáведнымъ. И́же щади́тъ глагóлъ произнести́ жéстокъ, разýменъ: долготерпѣли́вый же мýжъ премýдръ, лýчше и́щущаго наýки. Несмы́сленному вопроси́вшу о мýдрости, мýдрость вмѣни́тся: нѣ́ма же ктó себé твори́тъ, возмни́тся разýменъ бы́ти.
Вины́ и́щетъ мýжъ хотя́ отлучи́тися от другóвъ, на вся́ко же врéмя поноси́мь бýдетъ. Не трéбуетъ премýдрости мýжъ скудоýменъ, занé пáче вóдится безýмiемъ. Егдá прiи́детъ нечести́вый во глубинý зóлъ, неради́тъ: нахóдитъ же емý безчéстiе и поношéнiе. Водá глубокá слóво въ сéрдцы мýжа, рѣкá же изскáчущи и истóчникъ жи́зни. Чуди́тися лицý нечести́ваго не добрó, нижé преподóбно укланя́ти прáведное на судѣ́.
Присоединяйтесь к ОК, чтобы подписаться на группу и комментировать публикации.
Нет комментариев