Сы́не, а́ще прему́дро бу́детъ се́рдце твое́, возвесели́ши и мое́ се́рдце, и пребу́дутъ въ словесѣ́хъ твои́ устнѣ́ къ мои́мъ устна́мъ, а́ще пра́ва бу́дутъ. Да не ревну́етъ се́рдце твое́ грѣ́шникомъ, но въ стра́сѣ Госпо́дни бу́ди ве́сь де́нь:
а́ще бо соблюде́ши я́, бу́дутъ ти́ вну́цы, и упова́нiе твое́ не отсту́питъ. Слу́шай, сы́не, и прему́дръ быва́й и исправля́й мы́сли твоего́ се́рдца: не бу́ди винопі́йца, ниже́ прилага́йся къ сложе́ниемъ и купова́ниемъ мя́съ: вся́къ бо пiя́ница и блудни́къ обнища́етъ, и облече́тся въ раздра́нная и въ ру́бища вся́къ сонли́вый.
Слу́шай, сы́не, отца́ роди́вшаго тя́, и не презира́й, егда́ состарѣ́ется ма́ти твоя́. И́стину стяжи́ и не отри́ни мýдрости и учéнiя и рáзума. Дóбрѣ воспитовáетъ отéцъ прáведенъ, о сы́нѣ же премýдрѣмъ весели́тся душá егó. Да весели́тся отéцъ и мáти о тебѣ́, и да рáдуется рóждшая тя́. Дáждь ми́, сы́не, твоé сéрдце, óчи же твои́ моя́ пути́ да соблюдáютъ. Сосýдъ бо сокрушéнъ чуждíй дóмъ, и студенéцъ тѣ́сенъ чуждíй: сéй бо вскóрѣ поги́бнетъ, и вся́кiй законопрестýпникъ потреби́тся. Комý гóре? комý молвá? комý сýдове? комý гóрести и свáры? комý сокрушéнiя вотщé? комý си́ни óчи? Не пребывáющымъ ли въ винѣ́? и не назирáющымъ ли, гдѣ́ пи́рове бывáютъ? Не упивáйтеся винóмъ, но бесѣ́дуйте ко человѣ́комъ прáведнымъ, и бесѣ́дуйте во прохóдѣхъ: áще бо на чáшы и сткля́ницы вдáси óчи твои́, послѣди́ и́маши ходи́ти нажáйшiй бѣли́лнаго дрéва: послѣди́ же я́ко от змíа уя́звенъ прострéтся, и я́коже от керáста разливáется емý я́дъ. О́чи твои́ егдá ýзрятъ женý чуждýю, устá твоя́ тогдá возглагóлютъ стрóпотная: и возля́жеши я́ко въ сéрдцы мóря и я́коже кóрмчiй во мнóзѣ волнéнiи. Речéши же: би́ша мя́, и не поболѣ́хъ, и поругáшася ми́, áзъ же не разумѣ́хъ: когдá ýтро бýдетъ, да шéдъ взыщý, съ ни́миже сни́дуся?
Сы́не, не ревнýй мужéмъ злы́мъ, нижé возжелѣ́й бы́ти съ ни́ми: лжáмъ бо поучáется сéрдце и́хъ, и болѣ́зни устнѣ́ и́хъ глагóлютъ. Съ премýдростiю зи́ждется дóмъ и съ рáзумомъ исправля́ется. Съ чýвствiемъ исполня́ются сокрóвища от вся́каго богáтства честнáго и дóбраго. Лýчше мýдрый крѣ́пкаго, и мýжъ рáзумъ имѣ́яй земледѣ́лца вели́ка.
Присоединяйтесь к ОК, чтобы подписаться на группу и комментировать публикации.
Нет комментариев