Предыдущая публикация
Ӆув верӆаӆ нумман тайӆайт…
Там ванан рут Асов куртема щутщаты яңхмемн, кулуп хотн лялясам ёх эӆты вантопса шияӆасам. Щи порайн ар таӆ хатӆ сыс няврэмат тайты хотн рупитам ими Надежда Павловна Плеханова (Канева) ӆув лялясам ащеӆ Павел Алексеевич Канев, акеӆ Георгий Никифорович Плеханов, щи порайн тарма рупитам аньтеӆ Лукерья Марковна Канева (Шишкина) эӆты айкеӆ тус. Оша йис, хоттэӆ ёхн ӆув верӆаӆ нумман тайӆайт, интам хиӆы тумпи хиӆы Ким Плеханов соцсетят хоща ӆув эӆтэӆ ханшаӆ.
Павел Алексеевич Канев 1924-мет таӆн Поӆнават вошн саран хоттэӆ ёх хоща сэма питас. 17 таӆа ювмаӆн утаӆтыты щира Омск воша китса, щата «ВДВ ашкуӆа» хоща офицера утаӆтыяс, туп ант етшаптасӆы. Ванты, шеңк ӆаварт порая йис, щишн ӆув курсэӆ имохты ляля китсайт. Ӆув 9-мет воздушно-десантной бригадайн лялясты оӆңитас, щита уйтаң лялясам генерал-майор ху Иван Игнатьевич Курышев кущая ус. Там бригада солдатат «Вяземской» нэмпи воздушно-десантной операцияйн ляляссат. Щи порайн Ржевско-Вяземской наступательной операцияйн ӆув десантникӆаӆ роман тохӆаң хоп эӆты вуракат уӆам тахая иӆ навармасат па лялясты питсат. Щи тумпийн там бригада солдатат Смоленск вош эӆты вуракат воштаман тарма таранӆасат.
Павел Алексеевич Канев лялясам ёхӆаӆ пиӆн така вуракат воштас. Ипуш немщатн ӆув бригадаеӆ мохалая вусат. Щи порайн Павел Канев юш хоща нэмасыя ханяя минайт понас. Щи артан лялясмаӆн Павел курӆ мушмаӆтса, хувн госпитальн лекщитыӆас, еӆӆы ёхи китса. Щиты 1941-мет таӆ вунш тыӆащ 26-мет хатӆ вуш эӆты 1942-мет таӆ ун кер тыӆащ 15-мет хатӆ унты Павел Канев лялясас.
Пуӆнават вошн лекщитыйӆман ӆув рущ эви Лукерья Марковна Шишкина пиӆн уйтантыяс, мой версаңан. Ӆув ищи 1924-мет таӆн сэма питас. Ӆув ащеӆ Марк Шишкин туп ляль оӆңитам порайн щи манас, Москва хон вошев вуракат эӆты ӆаваӆмаӆн тарна йис. Лукерья ищи военкомата яңхмаӆн ляля вуратас. Радиста утаӆтыты китса, туп еӆӆы лялясты ант эсаӆса. Щи юкана юх эӆты пущкайт верты китса. Ӆув ликащас па имохты ёхӆы Овас муваӆа керӆас. Тата Суматвош район Устрём куртан хуӆ веӆпасӆаман рупитас. Щаӆта ӆув Поӆнават воша хуӆат эӆты арсыр эпӆаң ӆэтотат верты тахая китса. Тата ӆув иса ляль таӆатн яма рупитас, щишн мевӆ посат па ишакты нэпекат тайӆ.
Айӆат Канев семьяйн вет няврэм сэма питсат: Людмила, Галина, Надежда, Виктор па Анатолий.
Поӆнават вошн Павел Алексеевич 1943-1944-мет таӆңанан ВЛКСМ инструктора ус. Щаӆта Ӆорвош район воӆаң Муши воша китса, тата ӆув 1956-мет таӆ унты милицияйн рупитас. Еӆӆы хоттэӆ ёхӆаӆ пиӆн Яӆап (Горки) воша касӆас па «Кушеватской» нэмпи хуӆ завод хоща рупитас.
П.А. Канев тарма лялясас, щиты щи рупитас, щишн «За победу над Германией в Великой Отечественной войне 1941-1945 гг.», «За доблестный труд в годы Великой Отечественной войны 1941-1945 гг.» па па мевӆ посат тайс.
Ӆув 1992-мет таӆн антома йис, щи порайн 68 таӆа йис. Имеӆ 80 таӆ ӆоватн хув паната шушмас. Ӆын Яӆап вошн шависайңан.
Надежда Павловна Канева ӆын эван Поӆнават вошн педучилища етшаптамаӆ юпийн Асов куртан хатӆ сыс ай няврэмат тайты хотн воспитателя рупитас. Тата Виктор Георгиевич Плеханов пиӆн уйтантыяс, икеңа йис. Кат няврэм энмаӆтсаңан. Ӆув Георгий Никифорович Плеханов акеӆ ики эӆты ай тус. Ӆув 1894-мет таӆн тащаң семьяйн сэма питас. Г.Н. Плеханов Гражданской ляльн лялясмаӆн кавалериста ус. Еӆӆы Финской ляльн лялясас.
Уйт ӆор тыӆащ 9-мет хатӆан 1942-мет таӆн Воӆаң Отечественной Ляля манас. Ӆув бронетанковой пошкан эӆты немащ танкат пеӆа нёӆ эсӆас. Н.П. Плеханова ястаӆ: «Ӆув хунты потартас, итухаӆ порайн муң солдатӆув па вуракат окопайӆаӆ щикем ванан усат. Ӆув гранатайӆаӆ кутэӆн ёваӆсат. Туп ёхи хащам граната тайм ёх ӆыӆңа хащсат. Щимащ ӆаварт порайн Георгий Никифорович ӆаварта мушмаӆтса, щишн лекщитмаӆ юпийн ёхи китса. Така лялясмаӆ ураңан ар мевӆ пос тайс. 1965-мет таӆн антома йис, Асов куртан шавиман уӆ».
Там таӆ муң Воӆаң Отечественной Ляль сохнам пора вуш эӆты 79 таӆ постаӆув. Муң, там йисн уӆты ёх, Павел Алексеевич, Лукерья Марковна Каневңана па Георгий Никифорович Плеханова ун пумащипа ясаң ястаӆув. Нох питапса хатӆ пиӆн!
Людмила Шульгина ханшам потар
Следующая публикация
Нет комментариев