Вощиным кузе сакаш?
Тыгеат шоналташ лиеш: вощинан рамым сакаш нимо йӧсыжат уке. Омартам поч да ончылгоч ямдылыме вощинан рамым сакалте веле. Но чылт тыгежак огыл, ты шотышто икмыняр ойыртемым палаш кӱлеш.Тыгай рамым сакыме деч ончыч ешын вийжым, пӱртӱсыштӧ нектарым ойырышо пеледыш улмым, игечым шотыш налман.
Ондак тыгай йодыш лектын кертеш: омарташте вощиным кушко сакаш? Лиеш тулиган раме-влак коклашке, тыгак иканаште икмынярым. Но поче-поче огыл, тулиган раме-влак коклашке. Но тыгодым еш виян да нектарым ойырышо пеледыш ситышын лийшаш улыт. Мутлан, мӱкш кум рамым гына айла да тыгодым кок-кум вощинан раме-влакым пуэна гын, шотлан ок тол, мӱкш-влак огыт шупш.
Утларакше вощинан рамым тулиган ден перган раме-влак коклашке сакат. Вет кеч-кунамат тулиган раме воктене перган раме верлана. Эше тидым шотыш налман: рамыште вощиным кучышо проволко еш верланыме могырышто лийшаш.
Кокла куатан ешыште тулиге вич-куд рамыште лиеш. Тыгай омарташте вощиным тулиге айлыман тӱр раме коклашке вераҥдат. Виян ешыште тулиге шым утла рамым айла да вощиным омарта покшекат пуаш келша. Тидым шотыш налман: раме-влакым иканаште шуко ешарыман огыл. Тыге еш кылмен кертеш да чер вийым налын сеҥа.
Тидым шотыш налаш уто огыл: чоҥештен лекше мӱкшиге ешым посна омарташке колтымек, пайдале насекомый-влак шӱремӱкшлык карашым огыл, лачак пашаче мӱкшлык карашым гына шупшыт. Тиде йӧн дене шапаш карашан рамым ямдылаш лиеш.
Тидымат палаш уто огыл: мӱкшлан кеч-могай искусственный кочкышым пу, тудо вощиныш карашым ок шупш. Лачак омарташке пӱртӱсыштӧ улшо нектар пурымо годым гына шупшеш.
В.Смоленцев
Авторын фотожо
Присоединяйтесь к ОК, чтобы подписаться на группу и комментировать публикации.
Нет комментариев