У актаве Пасхі валанцёры парафіяльнай суполкі “Карытас” наведалі Мікалаеўшчынскі дом-інтэрнат для састарэлых і інвалідаў і Стаўбцоўскі цэнтр карэкцыйна-развіваючага навучання і рэабілітацыі.
Каб падзяліцца радасцю Уваскрасення Хрыстова, жанчыны вырашылі пачаставаць усіх насельнікаў дома-інтэрната пасхальнай выпечкай і цукеркамі, павіншаваць католікаў, якія там знаходзяцца, з Вялікаднем. Для выканання задуманага валанцёры папрасілі дапамогі ў знаёмых кандытараў, якія спяклі на заказ 300 пасхальных кулічоў. Большую частку іх разам з цукеркамі адвезлі ў дом-інтэрнат.
Дарэчы, перад святам у доме-інтэрнаце пабывалі легіянеры Марыі з мэтай апостальскай працы. Ад пробашча парафіі ксяндза Ігара яны атрымалі заданне паразмаўляць з католікамі, прапанаваць ім паспавядацца. У выніку восем чалавек прыступілі да велікоднай споведзі. Ксёндз Ігар прапанаваў падрыхтаваць гэтым людзям карзінкі з асвячонай ежай, чырвонымі яйкамі і вербачкамі, каб і для іх свята Вялікадня стала сапраўдным.
Не засталіся без увагі нашага пробашча і дзеці-католікі, якія наведваюць карэкцыйны цэнтр: перад святам ксёндз Ігар удзяліў ім намашчэнне хворых.
Валанцёры ж для дзяцей з цэнтра сабралі пакецікі з цукеркамі і кулічыкамі, змайстравалі цудоўныя карзінкі для чырвоных яек. Атрымалася ярка і прыгожа. Вельмі хацелася зрабіць прыемнае дзеткам, у якіх няпросты лёс, і хоць на нейкі час убачыць усмешку на іх тварыках і радасць у вачах.
Загадчыца цэнтра Святлана Сікорская сказала, што калі хтосьці з дзетак убачыў у акно жанчын з каробкамі, то закрычаў ад радасці: “Касцёл ідзе!” Яна запрашала наведвацца часцей, каб дзеці мелі стасункі з рознымі людзьмі, маглі на нейкую хвіліну абстрагавацца ад сваіх праблем, адчуць людскую неабыякавасць да сябе. Напэўна, усім бацькам вельмі хочацца бачыць сваіх дзетак здаровымі і вясёлымі. Дык няхай жа свята Уваскрасення Хрыстова прынясе надзею на лепшае, стане праменьчыкам святла для кожнай сям’і і для кожнага з нас.
Ганна Бычынская
Фота Ганны Куніцкай
Присоединяйтесь к ОК, чтобы посмотреть больше фото, видео и найти новых друзей.
Нет комментариев