Предыдущая публикация
Нефтекамскысе фестиваль - сагынен вучымо уна
Кум ий тиде пайремнам вучен илыше-влакым тений куандарена. Кумдан шарлыше чер чакнымылан куанен, кеҥежымак ямдылалташ тӱҥална.
Концерт программыш ешартыш коллектив-влакым ушаш газетнан «ВКонтакте» лаштыкыштыже йӱклымаш конкурсым эртарышна, эн шуко йӱкым погышо кум ансамбльым фестивальышкына ӱжна. Но Благовещенск ола гыч кокымшо верым налше «Оҥгыр йӱк» фольклор ансамбльын вуйлатышыже «Миен огына керт» манын возен колтыш, садлан нунын олмеш Илиш район гыч йӱклымаш почеш нылымше верыш лекше «Ош Виче сем» коллектив толеш.
Шыжым илышыште адак вашталтыш лие. Шуко шонаш перныш: тиде концертым эртараш але адак кораҥдаш? Верысе калык деч йодыштна, толшаш участник, лудшо-влак дене каҥашышна. Нефтекамскыште лач ноябрьыште кажне ийын Марий тӱвыра тылзым эртарена. «Поро йӱлам кӱрлаш огеш кӱл, - тыгай иктешлымашан ойым пуышт мыланна. - Моло-влак эртарат вет. Афиша-влакым ончет - ик марий концертат уке. Муро эре кӱлеш, а неле пагытыште тудо полша веле: чоным пасылтара, пырля лиймаште ойгым шалата…»
Тыге темлымашым шотыш налын, регион-влак кокласе фестиваль пайремнан поро йӱлажым огына мондо манын ойым пидна да тушко молымат пагален ӱжына!
Следующая публикация
Нет комментариев