ЯК ПРЫГОЖА КВІТНЕЮЦЬ ЯБЛЫНІ Ў ГЛЫБОКІМ!
Колькі ў Глыбокім сквераў? Удакладняю: не паркаў, не плошчаў, а сквераў. Што я разумею пад скверам? Ну, напрыклад, Алея славутых землякоў. Гэта – сквер? Ну, так – сквер. На плошчы 17 Верасня – сквер? Так! Дрэвы розныя пасаджаныя, ёсць там фантан, помнік кнізе, помнік Езусу і самаранцы. Сквер, дзе стаіць помнік барону Мюнхгаўзену? Так, сквер!
Ну і колькі ж такіх сквераў у Глыбокім? Я налічыў па ўсім Глыбокім блізу 40. Можа і больш ёсць, але я збіўся з ліку… Шмат!
І чым яны адметныя? Ды, не чым! Звычайны набор абарыгенных дрэваў: ліпа, клён, бяроза, рабіна, сасна, зрэдку экзоты – накшталт блакітных ялінаў. Ну, яшчэ – клумбы з кветкамі.
А хацелася б большага! Ёсць жа ў нас Доследны лясгас, Дэндрасад -- помнік прыроды… Ну, пасадзілі б які пірамідальны дуб, яліну ніцую… Ды, не, прэтэнзіі я не прад’яўляю… Думкі ўслых! Глядзіш, пасаджаны цяпер экзот –гадоў так праз 50 стане помнікам прыроды… Шыльдачку павесяць, турыстам будуць паказваць… Але, так далёка ў нас яшчэ не думаюць… А вось Віктар Ламака ў 1960-я так думаў… Пасадзіў дэндрасад, які цяпер помнік прыроды рэспубліканскага значэння!
Ды й наогул, кожны з такіх скверыкаў, як у Варшаве, напрыклад, можна прысвяціць нейкай вядомай асобе… Напрыклад, пісьменніку Міхасю Машару, ці, нават, Барысу Кіту – самаму вядомаму вязню глыбоцкай турмы, з дапамогай якога, потым, амерыканцы даляцелі да Месяца!
І ўсё ж у гэтых скверыках, і цяпер, усё ж, можна знайсці цікавыя пасадкі дрэваў. Вось як прыгожа квітнеюць сёння яблыні у адным з падобных скверыкаў у раёне МКК.
Комментарии 7