Таңлаўлы отаўым болғай ҳасылдан,
Жупар есик сылағайды шашымнан, −
Деп ҳәдикли ҳәўжар айтып жасымнан,
Үмит пенен ийилгенмен, енежан,
Шын ҳүрметти түйингенмен, анажан!
Бийпатманың уллы жолына қанық,
Басымды қәдирлеп, орамал салып,
Маңлайымнан сүйип, кеўлимди алып,
Бахыт тилеп, жубатқансыз, енежан,
Қызыңыздай унатқансыз, анажан!
Баўыр ети перзентине тең көрип,
Аспандағы ай ҳәм күнге теңгерип,
Үйреттиңиз, бәрин бил, деп меңгерип,
Өз анамдай сезилгенсиз, енежан,
Жуп тилекши есилгенсиз, анажан!
Бир дуўтарға қос тар болып сайланған,
Алтын тийек сезим менен байланған,
Тәғдиримниң көрки Сизден айланған,
Ығбалымның намасысыз, енежан,
Сүйгенимниң анасысыз, анажан!
«Пәлеги ашшы» деп гейде өкпелеп,
Душшы түйнек ақлықларын шөкелеп,
Мениң ул-қызыма меҳир төкпелеп,
Өз улынан артық көрген енежан,
Жәннет мәкан, көзге сүрмем, анажан!
Урпақларды кәмалына жеткерип,
Шарапатлы пәзийлет нур өткерип,
Жаралғансыз өмир ушын серт берип.
Жаратылыс Сиз арқалы анажан,
Бул дүньяның бас арқаўы, Анажан!
----------
Малика Жумамуратова. 15.05.2012.
Присоединяйтесь к ОК, чтобы посмотреть больше фото, видео и найти новых друзей.
Комментарии 6