Қўрқмайсизми менсизликнинг оҳларидан,
Тишларидан қўрқмайсизми ғичирлаган.
Қаро тунлар бўғзингизга қўлин тираб,
Соғинсангчи, соғин!- дея пичирлаган!
Қўрқмайсизми,
Сизни қўйсам соғинмасдан,
Мен йўқламас лаҳзаларчи, қийнамасми?
Ҳижрон деган тош юракли бир ялмоғиз,
Сизни муздек қучоғила сийламасми?
Қўрқмайсизми,
Девордаги соатингиз,
Қулоқларни ёраман деб чиқирласа.
Ичингизга ўт кетсаю,
Томирларнинг,
Қони қайнаб, қумғон каби биқирласа!
Қўрқмайсизми,
Қайга боқманг кўзингизда,
Битта сиймо, битта нигоҳ тураверса,
Бошқа манзил кўзлайсизу, юрагингиз,
Йўлингизни мен томонга бураверса?
Қўрқмайсизми,
Ё мардмисиз оламшумул,
Неча алпни тиз чўктирган ишқ эмасми?
Манаман деб кўкрак керган забардастлар,
Ўша ишқнинг бир оҳига енгилмасми?
Қўрқмайсизми,
Ногоҳ қулаб тахту-равон,
Кунпаякун қилса ишқни қисмат бирдан.
Сиз дунёда юрсангизу соғу-омон,
Мен сўрамай қўйсам сизни Худойимдан..!
Қўрқмайсизми...
Присоединяйтесь к ОК, чтобы посмотреть больше фото, видео и найти новых друзей.
Нет комментариев