Маень 15-це чистэ, Семиянь раськеютконь чистэнть, А. С. Пушкин лемсэ Национальной библиотекань актовой залсо, кона тыц пешксель од ломанде, панжовсь «Вельмема» фестивалесь. Те – кудораськень кезэрень койтнень-кирдатнень невтемась. Мероприятиясь ютавтови «Культура» национальной проектэнь «Шкинемань ломанть» федеральной теварсевксэнть лувсо «Культурань Российской фондонь» грантонть тевс нолдазь. Сонзэ ушодыцязо «Некоммерческое партнёрство «Национальный спектр» издателень ассоциациясь.
Фестивалесь ушодовсь «Народные семейные обряды» вастовоматнень эйстэ, конатнень пингстэ невтезельть Мордовиясо эриця раськетнень коест-кирдаст. Тень туртов анокстазель «Чиямонь койтне» театрализованной невтемась, косо ёвтневсь Кастуша од тейтерденть, сонзэ вечкемадонзо, эрямодонзо, мирденень лисемадонзо ды мирдень кудосо эрямодонзо. Кастушань роленть пек виевстэ налксизе ёроков, мазый эрзянь тейтересь, «Вармава» фольклорной ансамблясо морыцясь Мария Майорова. Ваныцятне талнозь вансть сонзэ лавтовонзо лангс празь эрямонь стакачитнеде, мелявтсть кисэнзэ ды весе шождасто лекстясть, зярдо весе стакачитне кадовсть удалов. Весе лия актёртнэяк кецявтызь ваныцятнень пек вадря налксемасо. Невтевксэнть молемазо сёрмадовсь видеос.
Налксицякс ульнесть А. С. Пушкин лемсэ национальной библиотекань важодицятне, Саранскоень Культурань кудонь творческой коллективтне: «Ламзурь» народной фольклорно-этнографической ансамблясь (прявтозо – Раиса Щанкина), «Вармава» фольклорной ансамблясь (ветицязо – Анна Трифонова), «Пилигрим» хореографической ансамблясь (ветицязо – Наталья Храмова). Невтемась мольсь колмо кельтнесэ: рузонь, эрзянь ды мокшонь.
А. С. Пушкин лемсэ Национальной библиотекань прявтось Анастасия Бакулина тешкстась: «Нацпроектэнть лувсо ноябряс тейтяно 24 мероприятият, конатнесэ карматано ёвтнеме минек раськетнень койтнеде-кирдатнеде. Проектэнть вельде истя жо нолдави «Вельмема» («Возрождение») сценариень пусмо, козонь совить весе сеть сценарийтне, конатнень минь невтьсынек проектэнть тевс совавтоманть перть. Те пусмось васняяк лезды культурань важодицятненень мероприятиянь ветямсто, школасо ды вузсо тонавтыцятненень.
А. С. Пушкин лемсэ библиотекань национальной краеведениянь литературань отделэнь прявтось Надежда Бочканова ёвтнесь, косто саезельть сценариенть туртов материалтнэ: «Неть койтнень-кирдатнень толковамс, панжомс сынст смустест лездась Национальной библиотекань фондсто саезь книгатне. Минек краеведениянь отделсэ улить весе эрзянь ды мокшонь раськень фольклоронь материалтнэ, конатнень коряс пурнынекак башка сценарий».
«Литова» эрзянь авань вейсэндявксонь прявтось Раиса Щанкина домкасто ёвтнесь кезэрень койтнеде: «Кото иестэ саезь тейтерькатнень тонавтсть викшнеме, кодамо, палянь стамо. Сынь мирдень лисемантень анокстасть эсест оршамот, панарт, палят, руцят, эрьва кодат нардамот. Пурнасть эстест эрямонь парь, кона чиявтомантень улезэ пешксе. А уш кода свадьбатнень налксесть, тень эряви содамс ды неемс. Коесь ульнесь пек мазый. Ютавтовсть аварькшнемат-урнемат, парявтнемат, казнень максомат ды лия ламо койть. Те ульнесь алкуксонь музыкальной драма, косо улить кода нусманя, истя кенярксов тевть. Тейтересь васня зярыя таргот урьниль, якиль кардазга, кудова, вальмалга – простниль весень марто. Кода кудатне сайсызь, мейле кармиль кенярксов моронь морамо.
Проектэнть пек домка смустезэ, эйсэнзэ эрямонь цела философия: кода эряви анокстамс мирдень экшс лисемантень. Эдь те истямо покш тев, конань пингстэ весе эрямот полавтови, сескак теньс эряви анокстамс прянть. А ней капшазь урьвакстнить, мейле иень ютазь явить. Икеле явоматне пек чуросто эрсесть. Нись мирдензэ меленть вансь, коронзо кирдсь. Ладясть ававтонть мартояк. Ававтне аволь пек чевтестэ вастыть урьватнень, сынь лиясто пижнить, лиясто сёвнытькак. Урьвась жо весе энялдоманзо топавтсынзе».
Залонтень пурнавкшность студентт, культурасо ды образованиясо важодицят, раськень шкинемань вечкицят. Нама, васняяк, путовксось алтазель од ломантненень, конат зярс эзизь сюлма пряст семиясо. Истят питней путовкстнэ тонавтыть одтнэнь арсезь ушодомс семиянь эрямо, косо эсь прянть ланга арсемась поты удалов…
Марина Агафонова
#газетаЭрзяньправда
#саранск
#мордовия
#эрзя
Присоединяйтесь к ОК, чтобы подписаться на группу и комментировать публикации.
Нет комментариев