У Шумілінскім лясгасе і лясніцтвах раёна багата моладзі. Старшыня прафсаюзнай арганізацыі прадпрыемства Анастасія Малашонак налічыла больш за сорак маладых работнікаў. Яны працуюць майстрамі лесу, ляснічымі, вальшчыкамі, бухгалтарамі, лесарубамі, вадзіцелямі, дыспетчарамі, механізатарамі, станочнікамі. Хлопцы і дзяўчаты адукаваныя, граматныя, актыўныя. І калі сёлета выбіралі прафсаюзны актыў, то ў яго ў пераважнай большасці ўвайшла моладзь – у яе багата ідэй і прапаноў.
Ахоўваюць лес ад хвароб і парушальнікаў
У аддзеле лясной гаспадаркі і лесааднаўлення працуюць Антон Шабанаў і Наталля Таболіч. Абодва закончылі Беларускі тэхналагічны ўніверсітэт. Антон мясцовы, а вось Наталля ў наш раён прыехала з Салігоршчыны. Кажа, што падабаецца і работа, і мясцовасць. Па спецыяльнасці дзяўчына інжынер-лесапатолаг, прасцей кажучы лясны доктар. Лесапатолаг абследуе лясныя ўчасткі, устанаўлівае прычыны пагаршэння стану лясных пасадак, ставіць дыягназ і выбірае метад лячэння. Наколькі правільна яно выбрана, залежыць жыццё і здароўе лясных парод. Вельмі небяспечным для шумілінскіх лясоў з’яўляецца караед, расказала Наталля. А ўвогуле ў кожнага дрэва свае ворагі і хваробы. Таму ўвага спецыяліста, прафілактыка тут маюць вельмі важную ролю. Акрамя сваёй асноўнай работы, Наталля Таболіч з’яўляецца трэйдарам – адказвае за пакупку і прадастаўлення тавараў і паслуг.
За аднаўленне лясной гаспадаркі адказвае і інжынер па ахове і абароне лесу Антон Шабанаў, які працаваў у лясгасе да тэрміновай ваеннай службы, адслужыў у роце ганаровага каравулу ў Мінску і зноў вярнуўся на радзіму. У пажаранебяспечны сезон ён занепакоены, каб не здарылася ўзгаранняў. Таму маніторынгі, рэйды праверкі ў гэты час амаль штодзённыя. А круглы сезон малады спецыяліст адказвае за ахову лесу ад парушальнікаў заканадаўства: каб не высякалі, не забруджавалі.
Ларыса ЗАЙЦАВА.
Присоединяйтесь к ОК, чтобы подписаться на группу и комментировать публикации.
Нет комментариев