Предыдущая публикация
Паянтан Тутарстан Республикинче #МойГеройМояСемья акци пуçланчӗ
Паянтан, апрелӗн 22-мӗшӗнчен, Тутарстан Республикинчи журналистсем #МойГеройМояСемья акци пуçарнă. Ăна Тăван çӗршывăн Аслă вăрçинче çӗнтернӗренпе 79 çул çитнине тата Раççейри Çемье çулталăкне халалланă. Асăннă флешмоб «Вилӗмсӗр полк» онлайн-акципе пӗрле иккӗмӗш çул иртет.
Республикăра пурăнакансем çак акцие хутшăнса социаллă сетьсенче хăйсен Тăван çӗршывăн Аслă вăрçине хутшăннă тăванӗсем çинчен каласа пама пултараççӗ. Çар çыннисем пирки кăна мар, тылра ырми-канми ӗçленисем çинчен те каласа пама юрать.
Акцие хутшăнакансен обязательнăй икӗ условие пăхăнмалла: çырни патне #МойГеройМояСемья хештег лартмалла тата хăвăр каласа паракан геройăн сăнӳкерчӗкӗ пулмалла.
Флешмоб иртнӗ вăхăтра республикăри массăлла хыпар хатӗрӗсем Тăван çӗршывăн Аслă вăрçине хутшăннă паттăрсем пирки каласа парӗç.
Пӗлтӗр #МойГеройМояСемья акцие Тутарстанра пурăнакан 700 ытла çын хутшăннă, вӗсем хăйсем çырнине «ВКонтакте» социаллă сетьре вырнаçтарнă. Кăçал вара акци тата анлăрах — пур социаллă сетьсенче те — иртет. Унта республикăри паллă çынсем те хутшăнма кăмăл тунă.
Хаклă вулакансем! Çак акцие сире те хутшăнма ыйтатпăр. Тăван çӗршывăн Аслă вăрçине хутшăннă, вăрçă вăхăтӗнче тылра ӗçленӗ тăванăрсем çинчен çырнине #МойГеройМояСемья хештег лартса, вӗсен сăнӳкерчӗкӗпе пӗрле социаллă сетьсенчи хăвăрăн страницăрсенче вырнаçтарăр та публикацин ссылкине «Сувар» хаçат редакцийӗн 89179076881 номерӗпе ватсап урлă ярса парăр. Вӗсене хаçатăн социаллă сетьсенчи ушкăнӗсенче, Телеграм-каналта кăларăпăр.
Акци 2024 çулхи апрелӗн 22-мӗшӗнчен пуçласа майăн 9-мӗшӗччен пырать.
Паттăрсене асра тытар, вӗсене сума сăвар, ӗмӗр-ӗмӗр асра тытар!
Следующая публикация
Нет комментариев