🪺Учора ў Мінску на рагу вуліц Філімонава і Парніковай прайшоў майстар-клас па падліку гнёзд варон. Управіліся за 80 хвілін да цемры. Было цікава. Арнітолаг Аляксандр Вінчэўскі расказвае, як гэта было:
"Мы метадычна абышлі ўсе дрэвы на выбраным участку, выразна абмежаваным. Лісце яшчэ невялікае, і гнёзды добра відаць здалёк. Мы выявілі 7 занятых гнёздаў варон (у пяці з іх птушкі наседжвалі – з гнязда тырчаў хвост, два яшчэ дабудоўваліся), 4 занятыя гнязды гракоў і толькі адно гняздо сарокі, якое яшчэ будуецца.
Акрамя таго, на карце мы адзначылі пустымі кружкамі 4 незанятыя гнязды варон і два – сарокі. Хутчэй за ўсё, гнёзды старыя, але каб упэўніцца, трэба яшчэ раз будзе іх праверыць у пачатку траўня.
Тры сарокі пераследавалі нас у пачатку і ў канцы ўлікаў. Гняздо сарокі, якое будуецца, мы заўважылі амаль выпадкова – там корпалася птушка з галінкамі, а ў аснове ляжала ўсяго каля дзясятка галінак. Можа і нічога яшчэ не атрымаецца, трэба пераправерыць.
Зафарбаваныя кружкі на карце – занятыя гнёзды. Гнёзды з яйкамі правільна называюцца “актыўныя”. Вароны, якія наседжваюць, імкнуцца павярнуцца ў гняздзе так, каб хвост быў схаваны каля ствала, так што прыйшлося пакруціцца вакол некаторых гнёздаў пад здзіўленыя погляды абывацеляў.
У канцы адзін мясцовы жыхар падышоў да нас пацікавіцца чым мы займаемся і падзяліўся фота і назіраннямі зайца-русака ў сваім агародзе на гэтым жа ўчастку".
✅Ты таксама можаш далучыцца да ўлікаў. Вось што трэба рабіць:
🔹Раздрукаваць карту/схему свайго мікрараёна (гэта можа быць скрыншот з Гугл ці Яндэкс карт, ці з Google Earth), пажадана выбіраць прамавугольны ўчастак.
🔹Абысці ўсе дрэвы на гэтым участку ў пошуку гнёзд.
🔹Адзначыць на карце кружкамі ўсе знойдзеныя гнёзды птушак: пусты кружок – гняздо незанятае, зафарбаваны кружок – занятае.
🔹Гняздо варон – купка галінак, зверху на якіх сядзіць птушка, звычайна бачна толькі хвост, у сарокі гняздо – збоку выцягнуты па вертыкалі авал, бо мае крышу. Птушку ўнутры не заўсёды бачна. Толькі гракі селяцца калоніямі. Але звычайна не цяжка вызначыць старое ці новае гняздо.
🔹Падпісаць на карце, чые гэта гнёзды.
🔹Абавязкова паставіць даты ўлікаў.
🔹З адной схемай можна рабіць і паўторныя ўлікі да канца інкубацыі ў самых ранніх варон (да 10 траўня), дадаваць новыя гнёзды і замалёўваць кружкі, калі гнёзды займаюцца.
🔹Пасля ўлікаў адправіць фота ці скан улікаў са сваім імем і прозвішчам на электронную пошту a.vintchevski@gmail.com 📌 Вельмі пажадана зрабіць ўсе ўлікі да 10 траўня, а першы на гэтым-наступным тыдні, пакуль лісце яшчэ не распусцілася і гнёзды добра відаць.
Цяпер мы толькі закладваем базу для маніторынгу. У наступныя гады будзе цікава паглядзець, што і як будзе мяняцца. Заадно паспрабуем праверыць гіпотэзу, што шэрыя вароны выцясняюць з гарадоў сарок.
Цікава як ужываюцца вароны і сарокі не толькі ў Мінску ці ў Гродна, дзе сарокі зніклі з горада.
Ні пуху! 🪶
📷 На фота гняздо шэрай вароны, з якога тырчыць хвост птушкі.
#птушкагода
Присоединяйтесь к ОК, чтобы подписаться на группу и комментировать публикации.
Комментарии 3