🌺 Эрвелина 🌺
Эрвелина Юзукбаева Пошкырт кундем Мишкан район Чорай селаште ила. Тудо ешыште нылымше йоча. Кум изаже да шольыжо улыт.
Эрвелина Чорай селасе Я.Ялкайн лӱмеш марий гимназийыште 2-шо классыште тунемеш. Сӱретлаш йӧрата, сандене урок деч вара «Весёлая акварелька» кружокышко коштеш. Тыгак окна ончылно пеледыш влакым ончен кушташ кумылан. Аважлан, коважлан тамле кочкышым ямдылаш полша. Эше ик йӧратыме сомылжо – крючок дене пидаш. Изи шольыжлан шарфым пидын пӧлеклен.
– Ӱдыр аза шочшашым пален налмеке, могай лӱмым пуымо шотышто шуко шонен омыл. Ӱдырем ончылгоч шонен коштмо ал (мечта) лийын. Ачаже тыгай лӱмым пуаш тореш лийын огыл. Эрвелина эрвел манмым ончыкта. Тудо эрвелмарий ӱдыр. Ешыште йочана-влак чылан марла ойлат, марий йылмым тунемыт. Южгунам ачаже воштылынрак йодеш: «Эрвелина, кас шуын, ынде Касвелина улат?» А тудыжо пеҥгыдын вашешта: «Кас шуын гынат, мый садак Эрвелина улам!» – каласкала аваже Анжелика Юзукбаева.
Присоединяйтесь к ОК, чтобы подписаться на группу и комментировать публикации.
Комментарии 1