ЧАБЫР ҮЛӘНЕ (ЧАБРЕЦ) – ИҢ ЯХШЫ ДАРУ ҮЛӘННӘРЕНЕҢ БЕРСЕ

Чабыр үләненең русчасы — чабрец, тимьян обыкновенный. Ул иренчәчәклеләр (губоцветные) семьялыгына керә. Агачка әйләнә торган сабаклы, ярымкуак кебек хуш исле үсемлек. Аның бөтен өлешләрендә дә эфир майлары бар.
Чабыр үләне яфракларыннан ясалган сыек экстракт бронхит, бума ютәл кебек үпкә авруларыннан файдалы булган пертуссин даруының төп составы.
Чабыр үләнен эчке органнар зарарланган очракта (аеруча үпкә) эчәргә киңәш итәләр. Эч киткәндә һәм газлар җыелганда файдалы.
Әлеге үсемлекнең чәчәк аткан вакытта җыелган агач кебек катмаган өске өлешен (үләнен) ашкайнату органнары, бөер һәм сулыш юллары авырулары вакытында төнәтмә ясап эчәләр. Югары сулыш юллары катары, бронхит, үпкә авырулары вакытында какырык чыгаручы, тынычландыручы, томалаучы чара буларак кулланалар.
Чабыр үләнен бакчада да үстереп була. Аны орлыктан чәчеп үстерәләр. Ул – җылы һәм якты яратучы үсемлек. Балчыксыл авыр туфраклы, грунт сулары якын яткан, караңгы, түбән урыннарда үсә алмый.
Чимал булып яфраклары хезмәт итә, аларны чәчәк аткан чорда җыярга киңәш ителә. Кайчы белән пөхтә итеп өске өлешләрен кисеп алып җыялар. Тамыры белән йолкып алырга ярамый! Җыйган яфракларны киптерәләр, төяләр, каты сабакларын аерып алалар. ТУЛЫРАК МӘГЪЛҮМӘТ САЙТТА https://nur.tatar/chabyr-ulene-chabrets-timyan/

ТРОМБЛАР БУЛМАСЫН ӨЧЕН

Тромбалар — операциядән соң, тамырлар җәрәхәте, өшү, эренле-септик авырулар һәм башка сәбәпләр нәтиҗәсендә барлыкка килергә мөмкин. Әгәр дә сездә авыру үсешенә этәргеч булырга сәбәпле бер, яки берничә фактор булса, чаралар күрергә вакыт.
ПРОФИЛАКТИКА ӨЧЕН КАЙБЕР КИҢӘШЛӘР:
Күбрәк хәрәкәтләнегез, даими рәвештә гимнастика ясагыз (күнегүләр түбәндә китерелде).
Кан оешудан сакланыр өчен аякларны югары күтәреп ял итү, йоклап алу файдалы.
Әгәр сез утырып эшлисез икән, күбрәк сыеклык эчегез, гәүдә торышын ешрак алыштырыгыз, вакыт-вакыт аякларыгызны һәм бармакларыгызны хәрәкәткә китерегез.
Аягыгызны өшетмәгез: вируслы инфекцияләр кан тамырларының эчке кабыкларына тәэсир итә ала, бу тромбофлебитка китерергә мөмкин.
ӘГӘР ДӘ ДИАГНОЗ КУЕЛГАН БУЛСА:
Иртә белән, йокыдан соң гади гимнастика ясагыз: аякларыгызны күтәрегез, алты-сигез тапкыр өскә һәм яткан көенчә ян-якка (кайчы) ясагыз.
Аннары аякларыгызны туры килеш тотып, сузылган аякка эластик оек киегез яки бинт белән бәйләгез.
Аякларны түбән төшергәч, моны эшләү файдасыз, чөнки веноз клапаннары төшә.
Тагын бер файдалы күнегү: үкчәләрне идәннән 1 см ераклыкта күтәреп аяк очларына басыгыз һәм үкчәләрегезне идәнгә кинәт төшерегез. Егерме тапкыр шулай эшләгәч, 10 секундка тәнәфес ясап алыгыз. Тагын ике тапкыр кабатлагыз. Көн дәвамында өч-биш тапкыр шулай «биеп алыгыз».
Авырлык күтәрмәгез, кайнар мунчаларга бармагыз, кайнар ваннага кермәгез.
Иртә белән профилактика өчен, 20 секунд саен салкын һәм кайнар суны алмаштырып, аякларыгызны (тубыкка кадәр) душта коендырыгыз.
Тигез өлешләрдә подорожник, кура җиләге яфраклары, каштан һәм ромашка чәчәкләре, меңъяфрак (тысячелистник) һәм рута үләне алыгыз. Шуларны бергә кушып 4 аш кашыгы салып, термоста, 1 литр кайнап торган су салып, сигез-ун сәгать төнәтегез, сөзегез һәм иртә-кич эчегез. Әлеге катнашмадан компресс та ясарга мөмкин.
Тамырлар ялкынсынган урыннарга, иртән һәм кичен алма серкәсе (яблочный уксус) сөртегез. Мондый массаждан соң бер айдан тамырлар кысылырга тиеш.
Ат каштаныннан ясалган препаратлар кулланыгыз яки үзегез ясагыз.
Шешкән очракта нечкә итеп туралган чи бәрәңге яки керән (хрен) яфракларыннан төнгегә компресс куегыз.
Аяк астына валик куеп йоклагыз.
ТАБИБ БЕЛӘН КИҢӘШҮ МӘҖБҮРИ!
https://nur.tatar/tromblar-bulmasyn-ochen/

КӨТҮЧЕ СУМКАСЫ (СУМОЧНИК ПАСТУШИЙ) ҮЛӘНЕ

Бу үсемлек әвернә чәчәклеләр семьялыгына керә. Төньягыннан кала, Рәсәйнең барлык территориясендә очратып була. Бушлыкларда, юл буйларында, басуларда һәм башка табигый өслекләре бозылган урыннарда үсә.
Көтүче сумкасы халык медицинасында, элек-электән, аналыктан кан киткәндә канны туктату өчен файдаланыла. Аны сыек экстракт, төнәтмә кебек кулланалар.
Төнәтмә болай ясала: 1 стакан кайнап торган суга 10 грамм үлән салалар, көненә 3-5 тапкыр 1 аш кашыгы эчәләр.
Көтүче сумкасы төнәтмәсе башка төр эчке кан китүләрдән (үпкә, бөер һ.б) дә кулланыла. Бәрелгән-сугылган урыннарга компресс, примочка өчен дә ярый.
Бу үсемлекнең түбәндәге авырулардан да кулланылуы хакында мәгълүм:
- гастриттан;
- ашказаны җәрәхәтеннән;
- сидек куыгы ялкынсынганда;
- хатын-кызлар авыруларыннан;
- еш кан китүле һәм кан какырулы туберкулездан;
- бавыр һәм үт куыгы авыртканда;
- эч китүгә каршы;
- борыннан кан киткәндә борын эченә тамызу өчен.
Үләнне чәчәк аткан чагында җыялар. Киптергәннән соң 3 ел сакларга мөмкин.
Дәваланыр алдыннан табиб белән киңәшегез!