#беларускае_слова Вобыск, вобшук, ператрус? Для сучаснае беларускае мовы — вельмі актуальнае пытаньне… У старабеларускай мове і нават у Статутах ВКЛ быў „вобыск“ — ад „іскаць“. Але гэты дзеяслоў паступова зьнік зь беларускае мовы (у некаторых гаворках ён застаўся, часта азначаючы спэцыфічнае дзеяньне — пошук вошай). Замацаваўся іншы дзеяслоў — „шукаць“, і „вобыск“ страціў словаўтваральны грунт. Слова „вобшук“ новае і, відаць, скалькаванае з „вобыску“. Але самае пашыранае — даўняе народнае слова „ператрус“ (ад „ператрасаць“, „ператрусіць“). Яно яскрава перадае сутнасьць рытуалу.