Прапішы ў сваім сэрцы любоў,
Каб яна там жыла і натхняла,
Каб знаходзіла тысячы слоў
Самых лепшых для родных, каханых.
Прапішы ў сваім сэрцы вясну,
Каб яна красавала, лунала
І дарыла спакой, чысціню,
Вольнай птушкай да неба ўзлятала.
Прапішы ў сваім сэрцы святло,
Каб яно, як праменьчык, зіхцела,
Каб дарыла спагаду, цяпло
І заўсёды нязгасна гарэла.
Прапішы светлых мараў палёт,
І цярпенне, і ласку, і ўдачу,
І усмешку ў вачах круглы год,
І надзею, і веру ў прыдачу.
Даната Варабей