Бу тезмә фикерләрем Мәүлед көненә багышлап үткәрелә торган
чараларда шапырып, буш сүз куертучы кайбер каләмдәшләргә,
шулай ук, калаларда һәм салалардагы мәчет - мәхәлләләрдә тирән белем
туплауга омтылмаучы кайбер имамнарга да багышлана.
1.
“Әлхәмдү лилләһи раббил – галәмин!”* –
Шул тәфсирне олыласын каләмем.
Раббыбыздан рәхмәт өмет итәек,
Пакъ иманда нурласын, дип, галәмне.
Акландырып өметләрен бәндәнең,
Йә, Каадиру, тугрылыкка күндергел,
Залимлыкны, җаһиллыкны сүндергел,
Күңелләргә мөттәкыйлык** иңдергел!
Җаһиллыкның чыганагын-тамырын
Тик Син генә кодрәтлесең кисәргә;
Йә, Илаһым, рәхмәтеңне ирештер
Калебләрдә камиллеккә үсәргә.
Бар галәмгә рәхмәт өчен җибәргән
Рәсүлебез зиһененнән аң алып
Яшәүче кавемнәрнең сафына
Кодрәт иңдер, югалмаска таралып.
Кыямәттә Рәсүлебез куаныр
Күреп ничек ишәйүен өммәте!
...Раббым, безне гамәл өчен яралттың,
Гамәл аша тапса идек һиммәтне***
2.
Хаталанма, “кабатланган фикер”, дип,
Мин аларны башламадым сүз юктан;
Үз-үзеңә сорау биреп, кардәшем,
Җавап эзлә, гамәли чынбарлыктан.
Кай тарафларга юнәлгән адымың
Бу дөньяның бормалы юлларыннан?
Нинди фикер, нинди гамәл-фигыльләр
Кылу теләге яши уйларыңда?
Фани дөнья сыйдыра ул барысын:
Ни кылсаң да, ирегең үз кулыңда,
Тик, азынсаң - “нәфес” дигән коткы да
Сагалап тора үтәчәк юлыңда...
“Хәрам” дигән чит өлешкә кызыгу,
“Күрмиләр”, дип, бозыклыкка алдану,
“Гайбәт” дигән мәкруһ гамәл, хөседлек
Басар җанны, азынуга ялганып.
Хактыр, матур, шома сүзләр артында
Бидгатьлекләр кылуларың күренмәс,
Тик, риялыкка тәңгәл фигыльләрдән –
Җәһәннәмнең кайнар уты сүрелмәс...
Үтим, дисәң, нечкә сират аркылы
Хак Тәгалә кодрәтендә, яшендәй –
Калебеңне пакъла иман нурында,
Риялыклар ышыгына яшермә!
Бу фанилыкта яшәүнең мәгънәсе –
Бакыйлыкка әзерләүдер үзеңне.
Кабатлагыл: “ Ләәәә илааһе иллаллааһ!” –
Оҗмах нуры балкытсын, дип, йөзеңне.
“Әшһәдү әллә иләһә илләллаһү” –
Кәлимәи-шәһәдәтнең асылын,
Аның оҗмахларга ачкыч булуын
Уйларга вакыт тап, һәрдәм, басылып.
“...Үә әшһәдү әннә Мүхәммәдән гәбдүһү
Үә Рәсүлүеһ” - Хакның мәшһүр вәхие –
Бар галәмдә изгелекләргә ия,
Мөэминнәрне ярлыкар сүз, дәхи дә.
Раббыбыздан иңдерелгән Зур Бүләк –
Коръән сүзе – Галәмнәрнең кануны –
Рәсүлебез хозурына ирешкәч,
Нур - чырагы булды әдәм җанының.
Фанилыкта җаһилият томанын
Куар өчен, Рәсүлебез сүзләре –
Хәдисләре – тукталмасын балкудан,
Нурландырып калебләрне, күзләрне!
3.
Безгә Тәңредән ирешкән вәкаләт –
Җир вә күкләр каршысында җаваплы.
Мәхшәр көнне гамәлләрне исәпләп ,
Хакъ Тәгалә Үзе билгеләр хакны.
Булалдыкмы гаделлекләр үрнәге?
Җәбер күрмәдеме мөэмин кешеләр?
Бидгатьлекләр булмадымы гамәлдә?
Мәгънәсезгә сипмәдекме буш сүзләр?..
Тәкәбберлек мәкруһына чыланмый,
Мин-минлеккә юнәлдерми күңелне,
Максат итми сәдакалар җыюны,
Вәкарьлексез үткәрәлдекме көнне?
Бәс, беләбез, Раббыбызның кодрәте
Җитдилектән, тегәллектән корулы.
Ул – сөймидер урынсыз шапрынуны,
Артыклыкны, бик вакланып торуны...
Олуг Китап—шәригатьнең нигезе,
Чакыра гел гаделлеккә, пакълыкка;
Ул яшидер әхлаки канун булып,
Бакыйлыкта юл табарга шатлыкка.
Ул — Галәмдә һәркем өчен кадерле,
Олуг серләр хәзинәсе, ачышы,
Аны беркем үзгәртәлмәс, бозалмас,
Чагыла анда ике дөнья балкышы.
Ул — инсан өчен чиксезлек-тирәнлек;
Тик мөмкинме тулы серен ачырга?!.
...Гыйлемлекнең безгә дигән насыйбын
Файдаланудан тырышмыйк качырга...
Кабул итеп сөннәти фикерләрен—
Рәсүлебез мирасын – хәдисләрен,
Иңдерсәк иде калебләр түренә,
Киңәйтеп аның мәгънәви чикләрен.
Гыйлем-хәзинәм балкыштай булсын, дип,
Омтылаек тирән белем истәргә,
Юллар табышыйк битараф- гамьсезгә -
Хаклык нурын җанга кабул итәргә.
Фанилыкта җаһилият томанын
Таратырдай акыл-зиннәт иясе
Булыр өчен — бидгатьләрсез, риясыз –
Хакъ каршына сәҗдәгә иеләсе.
Була алсак тәкъвалыкның үрнәге,
Дин-исламда “сәүдә кылмый” дин белән —
Коръән нуры, Рәсүлнең шәригате
Балкыр иде, биләп Җирдә киң күләм!
Шул чак безнең Рәсүлебез - Раббының
Ярлыкавы зиннәтенә ирешер,
Шунда безнең калебтәге омтылыш
Гаршенең хозуры белән күрешер,
***
Фанилыкта, һәрдаим, онытмыйча
Иң олуг һәм иң кадерле сүзләрне
Тәкрар кылыйк: “ Ләәәә илааһе иллаллааһ...” –
Оҗмах нуры балкытсын, дип, йөзләрне!
2011.
_________________________________
* ” Бөтен галәмнәрнең хуҗасы Аллаһка дан булсын”.
* * Мөттәкыйлык – тәкъвалык.
*** Һиммәт- теләккә омтылу, тырышлык.
Присоединяйтесь к ОК, чтобы посмотреть больше фото, видео и найти новых друзей.
Комментарии 3