(“1001 ҳикоя” туркумидан)
Аёл номидан...
Ишдан уйга қайтарканман, йўл-йўлакай уйга нималар кераклиги ҳақида ўйлаб кетардим. Бекзод акамниям хурсанд кўрмаганимга анча бўлди. Бугун айнан улар учун ўзгача таом тайёрлашни ният қилдим. Ахир роппа роса 7 йил аввал мана шу кун аҳду паймон қилиб мустақил ҳаётни бошлагандик, айнан шу кунда бир тану бир жон бўлиб ҳает аталмиш узун сўқмоқдан илк бор бирга қадам ташлагандик. Шуларни ҳаёл қилиб бозорга ҳам етиб келдим. Ул-бул харид қилиб бўлгач дарбозадан чиқаётиб кўзим бир қизчага тушди. "Бунча ширин бўлмаса" деб қўйдим ўзимга.
Қизча эса тинмай бир гапни такрорларди: "Аллоҳ йулига садақа қилинг". Чўнтагимдан майда пул чиқариб бердимда, ўз йўлимда давом этарканман, “Нега баъзи ота-оналар пул учун ўз фарзандларидан фойдаланишаркин, наҳот пул топиш, рўзғор тебратишнинг шундан ўзга чораси қолмаган бўлса" каби саволлар тинчлик бермасди. Ўйлаб қолдим.. Балки бу қизалоқнинг ота-онаси йуқдир. Йўқ, йўқ... Агар бундай бўлганида у бу ерда эмас, аксинча болалар уйида бўларди. Автобус деразасидан шуларни ҳаел қилиб кетаётганимда Бекзод акам қўнғироқ қилдилар.
- Алло Малика?
- Ассалому алейкум Бекзод ака. Яхшимисиз?
- Ваалекум ассалом. Раҳмат. Қайтаяпсанми уйга?
- Ҳа қайтаяпман. Автобусдаман. Ярим соатларда уйда буламан.
- Хоп, майли. Кечки пайт кўришамиз.
- Хоп яхши етиб келинг.
Суҳбатимиз доим шу зайлда кечадиган бўлиб қолган. Авваллари соатлаб гаплашсак ҳам худди гапимиз тугамайдигандек эди, ҳозир эса дунёда "ҳа", "йўқ" дан бошка сўз қолмагандек гўё...
Уйга кириб кечки овқатга тайёргарлик кўра бошладим. Бугун ўзгача кун.. Демак кечки овқат ҳам ўзгача бўлиши керак. Атайин бозордан энг сара балиқ сотиб олдим. Бир ой олдиндан ҳаёлан нималар қилишимни ўйлаб қўйдим. Интернетнинг қайсидир сайтида газ печида пишириладиган балиқни кўриб, бир кун пишириб кўриб эримни хурсанд қилишни ўйлаб қўйгандим. Айнан шу бугунга насиб қилган экан...
Хуллас балиқни тайёрлаб печга тиқдимда, залда романтик муҳит яратишга киришдим. Столга фақатгина нозик меҳмонлар келганда ёзиладиган нафис нақшли дастурхон ёзилди, қўл сочиқ ва муаттар ҳидли шамчалар қўйдим. Қайси қўшиққа рақс тушишимизни ҳам аниқ эди: Sarah Cornor "Just one last dance". Ана энди навбат сенга малика деб ётокхонага кирдим, романтик муҳитга мос кийиниб бўяндим. Бу орада балиқ хам пишай деб қолганди. Эҳҳ... сизнинг биргина табассумингиз учун бош ошпаз бўлишгаям тайёрман Султоним.
Ҳаелларимни эшик қўнғироғи бузди. Бекзод акам келдилар, эшикни очдиму ҳайратда қолдим. Мен уларга ўзимча сюрприз қилмокчи эдим, эрталаб ишга кетаётганларида ҳам бугунги кун ҳақида оғиз очмагандим атайлаб. Улар ҳам атайлаб индамаган кўринадилар. Бир қўлларида оппоқ гулдаста, яна бир қўлларида бир қути шоколад.
- Ассалому алейкум яхши етиб келдизми? Воой булари чиройлилигинииии... Хурсандлигимдан кўзларимдан нур порларди гўё.
- Ва алейкум ассалом, қалесиз Маликам? Мансиз зерикиб қолмадизми? Калай, ёқдими гуллар?
Уларни аста залга бошладим, ҳайратдан қотиб қолдилар. Кутмагандилар шекилли... Хуллас шинамгина стол атрофида иккимиз бир-биримизга ширин табассум ҳадя қилганча овқатландик. Кейин эса майин садолар остида рақс туша бошладик. Эҳҳ... қачон охирги марта бир-биримизга мана шундай меҳр улашганимизни ҳам эслолмайман...
10 йил аввал... Мен биринчи курс улар эса тўртинчи курсда ўқирдик. Ўқишда севги изҳор қилганлар кўп бўлди, лекин қалбим уларни танлади. 3 йил ичида бир биримизга шу қадар боғландикки, энди айрилиқ ҳақида ўйлаш биз учун гуноҳ эди. Мени отам катта бизнесмен, оиламиз эса ўзига тўқ оила эди. Бекзод акамни оиласи эса оддий ишчи оила. Отам мени у кишига бермасликка қанча уриндилар, Бекзод акамни оналари ҳам “Бойнинг қизи эрка бўлади, ундай келин менга керакмас” деб қаттиқ курашдилар, Лекин биз ўз сўзимиздан қайтмадик. Севгимиздан воз кечмай аҳду-паймонларимизга содиқ қолдик.
Катта тўй-тантана билан турмуш қурдик. Бу оламда биздан бахтли жуфтлик йўқдек эди гўё...
Ҳаётимиздаги энг ширин кунлар бошланди. Ўз вазифаларимни бекаму-кўст адо қилишга ҳаракат қилардим. Ойижоним ўйлаганларидай бойнинг эрка қизи эмас, аксинча шу оилага муносиб энг ибратли келин булишга аҳд қилдим. Кунлар ойларни, ойлар эса йилларни қувиб ўтарди. Ҳамма мендан хурсанд, она бола орасидаги эски гиналар ҳам унитилгандек эди... лекин Аллоҳ бизни фарзандсизлике билан синади.
Кечалари Аллоҳдан фарзанд сўраб тунларим бедор ўтар, бормаган докторимиз, кўрсатмаган табибимиз қолмади. Ҳаммаёқда бир жавоб, фарзандсизликка сабаб йўқ. Бирдан бир даво эса бу сабр эди... Қўни-қўшниларнинг таъна дашномларию, ойижонимнинг илмоқли гаплари кундан кунга кўпайса кўпайдики асло камаймади. Қайним уйлангач бир йил ўтмай ўғил фарзандли бўлди. Бекзод акамнинг ҳам юзларини қувонч, табассум тарк этди. Гап-сўзларга чидолмай мени ижара уйга олиб чиқиб кетдилар. Бир кун юрак ютиб “Ажрашайлик, балки бошқа турмуш кўрсангиз фарзандлик бўлиб кетарсиз” дедим. Улар жахл билан “Йўқ сендан ўзгадан фарзанд кўриб бахтсиз ўтгандан кўра, сен билан фарзандсиз бўлса ҳам бахтли яшяганим яхшироқ” дедилар. Бошқа бу мавзуга қайтмадик. Бекзод акам дўстлар даврасига ҳам қўшилмай қўйдилар.
Дустларининг таъна-дашномларига чидолмай тўй-ҳашамларга ҳам бормасликни, борсалар ҳам тез қайтишни одат қилдилар. Эркаклик ғурурлари синди мени деб. Уларни бу аҳволда кўриб баттар ич-этимни ердим...
Шу зайлда мана 7 йил ўтди ҳамки фарзанддан дарак йўқ. Шуларни уйлаб йиғлай-йиғлай ухлаб қолибман.
Эрталаб чой ичиб, Бегзод акамни ишга кузатиб, ўзим ҳам ишга кетдим. Кечаги қувончли кайфият ҳамон ҳамроҳ эди.
Ишдан чиқиб бекатдаги холадан ҳар ҳил ширинликлар олиб бозорга бордим. Бекатда тушиб нигоҳларим ила уни излардим. Қаёқда қолди экан?! Нигоҳим бир бурчакка беркиниб олганча хўнг-хўнг йиғлаётган ўша маъсум қизалокка тушди. Қизча йиғлар, ёнида эса қўлида ёш боласини кўтарганча бир аёл уни тинмай туртиб уришарди. Аста олдиларига бордимда, чўнтагимдан майда пул чиқариб бердим, ўзим эса сал нарироқдан гап нимада эканига қизиқиб сухбатни эшитишга ҳаракат қилдим. Қизчани қорни очиб мўлжалдан сал кўпроқ ҳаражат қилганига шекил аёлни фиғони фалак эди. Аста аëл олдига бориб саломлашдим ва қизчага ким болиши ҳақида суриштирдим. Аёл кўзида ёш билан онаси эканлигини таъкидларди.
- Аслида 3 та фарзандим бор, Ҳадича энг каттаси. Яна бир қиз, бир ўғлим бор. Эрим ичкиликка берилиб кетган, доим маст ҳолда келади. Маст ҳолида ўзини бошқаролмай қўлига тушган нарса билан бизни ура кетади, токи шайтон сувига пул ундирмагунча қадар ураверади. Эрим пул топмаса, ман аёл бошим билан нимаям қила олардим. Катта оилани тебратиш осонмас. Давлат ишидаям ишлаб кўрдим, лекин маълумотим йўқлиги сабабли маошим жуда камлик қилди. Охир-оқибат шу йўлга кириб кетдик. Қизим шу ерда, мен эса йулнинг нариги тарафида тирикчилик қиламиз.
Мен унга индамай яна бироз пул бериб уйга қайтдим.
Кечаси билан бозордаги қизчани ўйлаб чиқибман. Бир марта Бекзод акам болалар уйидан бола асраб олишни айтгандилар кўнмагандим. “Гап-сўзларга чидолмаймиз кейин, боланиям кўнгли яримта бўлиб қолади” деб кўнмагандим. Бугун эса бу ҳақида жуда кўп ўйладим.
Эртасига яна бозор томон шошилдим. Ҳадичани онасини топиб умримда биринчи марта виждонимни қийнайдиган таклиф бердим. Аёлни ранги ўчиб кетди бошида. “Йўқ, йўқ! Ўйлаб гапирдизми!” деб ман билан урушиб кетди. Кейин босиқлик билан тушунтирганимда индамай қолди. Қизчани асраб олиш ҳақидаги гапларим онасига қандай ботганлиги
Унинг кўзларидан кўринарди. Вақт ўтиб аёл билан кўп учрашдим. Бошида қаршилик қилган аёл қизи учун яхши, бекаму-кўст келажак ваъда қилганимда анча юмшади. Пул ҳақида сўз очсам ғалати бўлиб кетарди, лекин кўзларида қизиқиш борлиги билинарди.
Ҳар сафар Ҳадичани кўрганимда у билан соатлаб гаплашгим келарди, ширинликлар олиб борардим. Бир кун ҳаттоки Бекзод акам билан бозорда атайлаб унинг ёнига бордим. Эрим бу қизчага эътиборим кучли бўлганини кўриб кулиб қўйдилар.
Уйга келиб эса шу мавзуда секин сўз очдим.
- Бекзод ака, бояги қизни ширинлигини қаранг.
- Ҳа, ширингина экан..Кунлар ўтарди, Ҳадича ҳақида Бекзод акам билан кўп гаплашдик. Ниятимни этганимда мани қўлладилар. Ман ўзимда йўқ хурсанд эдим. Кўзларимдаги қувонч ёшларини кўриб “Жиннивойим, албатта уни қизимиз қилиб оламиз” дедилар. Энди аёлни кўндириш қолганди. Бунга кўп уриндик. Хуллас, уни кўндириш учун уч минг беришга мажбур ҳам бўлдик. Бу пулнинг ярми эди. Ниятимиз рост эканини, уларга ёрдам бермоқчи бўлишимизни шубҳа қилмасин деб олдиндан бериб қўйдик ярмини. Пул берганда ўзимни аҳволимни айтиб беролмайман. Виждоним **** битирганди, лекин фарзандли бўлиш орзуси кучлилик қилди. Ҳадичани қўлидан етаклаб боғчага, кейин мактабга олиб боришимни, уйда қўғирчоқлар ўйнаб мазза қилиб она-бола бўлишимизни ўйласам қароримдан афсусланмасдим.
Лекин. Бир кун қизча ғойиб бўлди. На онаси кўринарди. Ўзимни қўйишга жой тополмай қолдим. Сўраб-суриштириб уйини топдик. Бундай ҳароб жойда қандай яшаяпти одамлар, Ҳадичага жуда раҳмим келиб кетди. У қаттиқ касал экан. Шамоллаш ўпкасига ўтиб кетиб жуда қийналибди. Озиб кетган бечора. Уни бағримга босиб юм-юм йиғладим. Бекзод акам ҳам тинчлантира олмади. Аёлга эса агар қаршилик қилмаса қизчани бугуноқ олиб кетиб даволатишимизни айтдик. Зўрға кўнди. Ўзи эплолмаслигини тушунди шекилли.
Орадан икки ой ўтиб Ҳадича тўлиқ тузалиб кетди. Унга шунчалик меҳр берардимки, ҳамма ҳайрон қоларди. Биз ҳақиқий она-боладек бахтли эдик. Бекзод акам ҳам жуда бахтли эдилар. Ҳар куни ишдан ширинликлар, ўйинчоқлар олиб келардилар.
Болани асраб олиш бўйича ҳужжатлар эса чўзилди. Аёл ҳар сафар ҳар ҳил баҳоналар билан галга соларди. Охир оқибат бир кун уйимизга милиция билан келиб Ҳадичани олиб кетди. Ўзимни қўярга жой тополмасдим. Мани овутаман деб Бекзод акам ҳам қийналдилар. Тунлари мижжа қоқмай чиқардим. Аллоҳга ёлворардим Ҳадичамни қайтариб берсин деб. Уларнинг уйига борганимда эса маст эри қувиб солди “Санга берадиган қизим йўқ” деб. Дугоналарим ҳеч бўлмаса пулимни қайтариб олишимни айтишганида бунга кўнмадим. Виждоним йўл қўймади.. Уларни Аллоҳ йўлига эҳсон деб қабул қилишини сўрадим...
Икки ойдан кейин эса Бекзод акам билан йиғлашимизга сабаб воқеа бўлди. Шифокорим мани ҳомиладор эканимни айтганда дунёларга сиғмай кетдик қувончдан. Эр-хотин ниҳоятда бахтли эдик…
Кичкинтой билан оиламизга ҳақиқий бахт кириб келди. Қизчам шунақа ширингина. Қаерларидир Ҳадичага ўхшаб кетади. Уни эса бошқа кўрмадим. Бир марта маҳалласига суриштириб борганимда уларни оиласи кўчиб кетганини айтишди.
Ҳозир қизимни юзларидан ўпиб бахтли бўлишини сўраб дуо қилганимда албатта Ҳадича учун ҳам дуо қилиб қўяман.
Бахтли бўлгин қизалоғим...
(Тамом)
Присоединяйтесь к ОК, чтобы подписаться на группу и комментировать публикации.
Комментарии 1