ЛУХ АВТ - газета на ханты языке

Хоятат пиӆан рупитты нэ мойӆаптаса
Хасям ӆапатан Хон мув кусяев Владимир Владимирович Путин, Ӆорвош районан социальной службайн рупитты нэ Мария Владимировна Пуйко, «Заслуженный работник местного самоуправления» нэман юкатсаӆӆы.

Ун йиңк порая ӆэщатыман уӆты мосаӆ
Округеван кашң товийн няӆ курт ун йиңкан амарӆаты верытӆайт. Щит ураңан Тарко-Сале вошан, Овкуртан, Антипаюта па Уренгой куртатан ун йиңк эӆты сайӆаты рупатайт верты питсайт. ГКУ «Ямалспас» па тут хуратты отрядатан рупитты хоятат утаӆтасайт, хоты йиңк эпатты порайн, муй верты хошты мосаӆ.

Аса касаӆты ӆэщатыӆат
Еша уӆты Асна ноптаӆты пора ёхатаӆ. Ӆуңан Саңхамкуртаң ёх Хишпана касаӆӆат. Саңхамкурт эӆты, йиңк хуват, ноптаӆты панэӆ унты 207 километра манӆат.

Хон Петра вош вантты яңхсув
Ун кер тыӆащан, округ няврэмат #Путешествие89 образовательной тур хуват Хон Петра вош вантты тутӆысайт. Хой яма утаӆтыйӆ, антиӆаӆ-ащиӆаӆ вуӆы хотан па хуӆ веӆпасӆыман рупитӆат, щимащ няврэмат ун вош вантты пирысайт. Овкурт эӆты Светлана Артанзеева, Наталья Лонгортова па Никита Артанзеев яңхсат.

Вуӆыӆув пиӆан яңхӆув, щахрат мохаӆӆув
Юлия Германовна Лонгортова хоттэӆ хоятӆаӆ пиӆан «Кочевая семья» касапсая Овкурт эӆты касты хара яңхсат. Сит эӆты каматса ясаң ястас: «Надым воша оӆаң пуш ёхтыӆысув. Касапсая хоттэӆ хоятӆама ёнтам сохат тутӆысам. Муң пиӆэван хоӆна аңкем-асем, упңаӆам усңан. Ӆув па сохӆаӆ альсат. Вет ӆуматты сох этаӆтыты мосас. Ёх, нэ хоятат верам отӆув: саклакат, шашкеӆат, вайт, тупрат, няврэм порхайт, вуӆы кепаӆ эӆты ёнтам ханшет, сах, нуй саха ёнтты ханшет, катра охшамат, ёрн хырат, тутсяңат. Муй верам па тайты отӆув, иса этаӆтысӆув.

Ошаң ворңа ими
Каткутщевнэ тыхӆаӆан омасаӆ. Тыхӆаӆ щахла юх нуват кутан туса сэвман уӆ. Няӆ пошах тайӆ. Кашң пошхиеӆ вощхиман тайӆаӆӆы, вояң пирматан ӆапатӆаӆӆы. Щахла юх вошан Охсар ими тыеӆт-тохеӆт шушамтыйӆ.
– Щикем самем вохӆа. Йи пошхен манэм вощки, – нохӆы уваӆ.
– Ма щущем, наңен хун маӆэм, – щищкиеӆ ястаӆ.
– Щиты ки, юх иӆ сэварӆэм! Ӆыем хоща ӆайм ярман тайӆам! ¬– Охсар уваӆ.

Лаборовской нюраман касӆысув
Елена Павловна Тайбери Приуральской мув Охсар вош эӆты ёхтыӆыйс. Ма ӆув пиӆэӆан потрэмисам. Ясңаӆ эӆты: «Катра ма тасян яңхсам. Лаборовской нюраман касӆысув, Охсар вош эӆты катсот километра. Ин ветӆэм таӆ куртан уӆӆам. Охсар эӆты ныкӆы ветхосьяң километрайн хот тайӆаман, сита икем пиӆан уӆӆаман. Икем хуӆ веӆман уӆ, вуӆы ухӆат вераӆ. Ма па ёнтасӆам.