Щитаӆан, пушеӆан щаӆта юх сэңкты питсаӆӆы – этра тохараӆ. Щищкие паӆтамас, увты питас:
– Каткут щев-щев-щев! Охсар ими, юхем аӆ сэвры, пошхем туви!
Хоӆӆаман пошхаӆ иӆ вощкасӆы. Охсар имийн похаӆ аӆэмаса, ин па туса. Щищкие тыхӆаӆан хоӆӆаман омасаӆ, хоӆӆатаӆ кутан тыштаӆ. Ворңа имийн шияӆаса, инщасӆа:
– Муя наң тыштаӆан, хоты йисан?
– Охсаран пошхем туса, ма вурыем йинщса, – ястаӆ.
– Щи паӆат юха охсар хотсат ёхатаӆ? – па инщмаса.
– Охсаран юхем иӆ сэварты питса. Пушеӆн ӆайм ярман тайӆ, ¬– хоӆӆаӆ куняр вой.
– Наң муя щимащ отшам? Охсар хоӆща ӆайм вуӆ, – Ворңайӆ ястаӆ.
– Щикем паӆтап, самием хащ щи ким навармас, – щищкие ястаӆ.
– Па ки ёхатаӆ, юхен иӆ питты унты пошхен аӆ мийи, – Ворңа ими ястас. Щитаӆан ӆув верӆаӆ сахат пурӆамтас.
Щи кутан Охсар ими па ёхтамтас. Хуваӆта уваӆ:
– Самием щи вохӆа! Йи пошхен па мийи!
– Юва, ты хуңха па вуйи! Верытӆан ки! – ликащман Каткутщевнэ уваӆтас.
– Щиты ки, юх иӆ щи сэварӆэм, ¬– Охсар ими ястас.
Ӆыяӆан юх сэңкты питсаӆӆы – аӆ тарыйӆ. Щахла юх ант па нёхӆыйс. Охсар метас:
– Хойн па номасан катӆаптасайн? Ворңайн ки?
– Каткут щев-щев-щев! Ӆэпаӆтман пошхем ӆэсан. Пуңӆа мана няӆмаң вой!
Охсар ими манас Ворңайӆ каншты. Хув яңхас, ван яңхас, ун сорам нохр юх тайн ин войӆ шияӆасӆы. Сора иӆ оӆамтас, няӆмаӆ ким лукемасӆы. Охсар ими вурты няӆам Ворңайн хуваӆта шияӆаса.
– Тё, – Ворңа нумасаӆ, – щёмӆы войт ӆэпаӆтыты вурты Охсар па тата хаӆмаӆ! Ма ӆув няӆмаӆ-са ким сухтаӆэм!
Вана ӆатомтас, Охсар няӆам нухсаӆӆы. Охсаран щита мощатӆа.
– Щи, – нумасыйӆ Ворңа, – уӆмем арат!
Охсар пеӆа керӆаӆ па, сэмӆаӆ уна таӆман ястаӆ:
– Манэм мохты лакки менэми! Туп ун кев ӆоңӆа аӆ туви! Кев эӆты шеңк паӆӆам, самем мохты пелки похаӆ.
Охсар нумасаӆ:
– Туӆэм-са паӆ кев ӆоңӆа. Ант ки хаӆаӆ, кеввур эӆты иӆ поткаӆэм! Щаха ӆов шукӆаӆ ант уйтӆайт.
Кев вура нох тусӆы, кев кимӆа ӆощаӆтасӆы. Ворңа ими нёхеӆ аӆ тарыйӆ, сэмъйиңкӆаӆ муңхаӆ. Ӆаймаң Охсар еша ёхӆы хатас. Щаӆта щи навармас.
– Варх-варх! – верман, ворңайӆ нох пурӆамтас, туп омпсам лотаӆ хащас. Нохӆы туп хиш пусаң кавармийс. Щи.
Катра хоятат муя па ястаӆат: «Морт кеман уӆа. Кашң апраң от нумпия апраңшак от этаӆ, кашң ошаң от нумпия ошаңшак от этаӆ. Щи номас аӆ ёрэмаӆан, нумман таяӆан.
Нахрачёва М.С. шуңат монщиӆыйс, Касам-Нёӆан уӆам хоят.
Н.Н. Нахрачёв шуңат нэпека ӆэщатсаӆӆы
Хор: Н.Е. Циолик
Нет комментариев