Муаллиф ЮЛЧИ АШУРОВ
ТАСОДУФ
Зане дар истгоҳ истода, аз ҳар раҳгузар бо забони шикастаи русӣ чизе мепурсиду, ҳама китф дар ҳам кашида, гузашта мерафтанд. Аз тарзи либоспӯшиаш муайян кардам, ки зан ё тоҷик ё ӯзбек аст. Вазифаи супоридашударо дар понздаҳ дақиқа иҷро кардам. Зан ҳамоно дар ҷустуҷӯи суроға буд. Наздаш рафта салом додам.
- Ваалейкум салом, додар шумо тоҷикед?
- Дар Маскав ҳама тоҷиканд, - гуфта шӯхӣ кардам, - мебинам, ки кадом адресро аз ҳама мепурсед, шояд кӯмакатон кунам.
- Ба ман кӯчаи "Лучкин" лозим. Гуфтанд, ки "станция метро Водни"
- Ман ноҳияро бо тамоми кӯчаву паскӯчааш медонам, ин хел кӯча дар ин ҷо нест. Шумо ягон касро меҷӯед?
- Не, ба ман занг зада гуфтанд, ки дар мағоза кор ҳаст, фаррошӣ.
- Мағоза чӣ ном дорад?
- "Пятёрочка". Ду моҳ дар "Дикси" кор кардам, маошамро ба пуррагӣ надоданд.
Зан аз рӯи тахминам 60-65 сола метофт, дар ин синну сол ӯ бояд дар иҳотаи фарзандону наберагон давлати пирӣ меронд. Ӯ бошад дар Маскав фаррошӣ мекунад. Боз маошашро надодаанд.
- Дар Маскав ҳамроҳи кӣ ҳастед? Макони истиқомат доред? - пурсидам аз ӯ.
- Мо ҳамроҳи келину ду набераам дар дигар стансияи метро ҳуҷраеро ба иҷора гирифтем. Ду сол пеш писарам ба Маскав омаду бе ному нишон гашт. Аз рӯи шунидам, ӯро ҳабс кардаанд, дуздиву авбошӣ кардааст, беақл. Келину набераҳоро гирифта омадам. Гумон кардам, ки дар Масков писарамро меёбам, аммо ин шаҳр сару охир надорад. Насиб бошаду умр вафо кунад, ба дидори ҳамдигар мерасем.
Аз зан ному насаби писарашро пурсида, дар коғазе навиштам. Гуфтам, ки дар полис шинос дорам, аз база дар куҷо будани ӯро дастрас кардан мумкин. Зан хеле хурсанд шуд.
- Дар наздикии хонаи иҷораатон кор ёфт нашуд, ки ин қадар роҳро тай карда омадед? Масофа дур бошад, хароҷот ҳам зиёд мешавад.
- Ҳазору дусад сӯм (рубл) ба ҳар рӯзи корам ваъда карданд. Занг заданд, ки аз рӯзи душанбе ба кор ҳозир шавам. Рӯз нисф шуд, мағозаро намеёбам...
- Аз кадом рақам занг заданд? Метавонем баргашта ба ҳамон номер занг занем?
- Занг задем, аппарат ҷавоб медиҳад. "Яка пахш кунед, дуро пахш кунед", монда шудам, ҳамин адресаша ба фикрам хато навистам...
Коғазро аз дасти зан гирифта хондам, бо ҳарфҳои безеб, бо қалами ранга, дар як кунҷи газета "Водни, Лучкин" навишта шудааст.
- Мо "Лавочкина" гуфтанӣ кӯча дорем, рӯ ба рӯи шӯъбаи пулис магазин " Пятерочка" ҳаст, шояд ҳамон бошад?
Дар чашми зан шарораи умед шӯъла зад.
- Ба фикрам ҳамин хел ном дошт.
Занро ба мошин шинонида, то мағоза расидем. Бо мудири мағоза ҳамсӯҳбат шудам.
- Канӣ худи фаррош? Мо ӯро саҳар инҷониб мунтазир ҳастем.
Занро либоси махсус дода, дарҳол ба кор қабул карданд. Бечора зан аз хурсандӣ шукуфт, чӣ тарз изҳори миннатдорӣ карданро намедонист...
Аз байн чанд моҳ гузашт, хонаи якҳуҷрадори занеро таъмир кардам. Соҳибхона ба сифати кор аҳамият намедод, мегуфт, ки "ба иҷора медиҳам, ба ягон одами славянӣ, ки нанӯшад ва оиладор бошад". Зани тоҷик ба хотирам расид ва хостам ӯро дар ҳамин хона ҷойгир кунем.
- Намешавад, ду кӯдаки хурд доштааст, ҳамаро ифлос мекунад.-рад кард соҳибхона.
- Инҳо мӯҳлати дароз ба иҷора мегиранд, сари вақт маблағи иҷораро мепардозанд, дар охир хонаатро бепул таъмир карда медиҳам, - гуфтам ман.
- Ман бояд фикр кунам, аммо бо ду шарт: бо пулис худат гуфтугӯ мекунӣ, бачаҳо истироҳати мардумро халалдор накунанд.
Ба сифати харидор бегоҳӣ ба мағоза рафтам, аммо фаррош як зани ҷавон буд. Пас аз салому алейк аз зан пурсон шудам.
- Он кас модари ман мешаванд, чанд рӯз инҷониб бемор, дар хона бо ҳамроҳии кӯдаконам ҳастанд.
- Метавонам ба модаратон занг занам? Як хонаи якҳуҷрагӣ ҳаст, аз мағоза як истгоҳ.
Зани ҷавон аз кисаи пешдоманаш телефони тугмадор баровард.
- Мо як телефон дорем, аммо рақамашро ба шумо гуфта наметавонам. Ман шуморо намешиносам.
- Ман модаратонро мешиносам, он кас маро.
- Беҳтараш шумо рақами телефонатонро диҳед. Лозим шудед, худашон занг мезананд.
Рақами телефонамро навишта ба дасташ додам. Зан коғазро гирифту дар кисаи пешдоманаш хаст ва аз паи кораш шуд.
Нимашаб садои занги телефонам баромад, рақами ношинос. Донистам, ки ҳамон зан аст.
- Келин ҳозир аз кор баргашт ва рақами шуморо дод.
Ман дар бораи хона ва арзиши моҳонааш маълумот додам. Зан розӣ шуд. Пас аз ду рӯз занро бо ду набера ва чор сумкаи пурбораш дар станцияи метро пешвоз гирифтам. Хона писанд омад.
Дар байн аз пулис хабар гирифтам, ки аз рӯи маълумотнома марде бо чунин ном дар ҳақиқат дар Маскав сукунат дорад. Таи як соли охир дар як суроға дар қайд меистад. Суроғаро аз картаи навигатор ҷустуҷӯ кардам. Аз мо қариб дар масофаи бист километр ҷойгир шудааст.
Дар дунё одамони ҳамному ҳамнасаб хеле зиёданд. Бинобар хостам аввал аниқ кунам, ки ин шахс кист.
Рӯзи якшанбе аз рӯи суроғаи дар даст доштаам ба сафар, ба ҷустуҷӯи писари зан баромадам. Дарро ба пешвозам ҷавоне кушод.
- Ман аз рӯи эълон омадам, - гуфтам ба забони тоҷикӣ, - канӣ нотбука нишон диҳед.
- Чӣ хел нотбук? - ҳайрон шуд ҷавон, - мо ноутбук надорем.
- Эълонро дар "Юла" шумо навиштед?
- Мо инҷо понздаҳ нафар, кӣ эълон додааст?
- Кадоме аз шумо Далер аст? (ном иваз шудааст)
- Далер- соҳибхона. Ҳамроҳи занаш дар хонаи худаш, занг занам?
- Хонаи худаш дар куҷо?
- Намедонам, ба фикрам дар Подмосковья...
Рақами телефони Далерро гирифта ба кӯча баромадам ва занг задам. Дафъаи аввал гӯшакро набардошт. Дафъаи дуввум бо овози хирросӣ пурсид:
- Кӣ мепурсад?
- Арвоҳи падарат мепурсад, куҷоӣ ту?
- Кистед шумо? Падарам даҳ сол пеш вафот кардагӣ.
- Модарата пазмон нашудӣ?
- Кистед шумо?
- Зану кӯдакота пазмон нашудӣ?
- Занам дар барам, кӯдак надорам. Кистед шумо?
- Далер, ту маро намешиносӣ, ба ҳоли модари пират раҳм кун, ӯ дар Маскав, ҳамроҳи зану фарзандот. Биё, аз аҳволаш хабар гир. Ӯ гумон дорад, ки дар маҳбас ҳастӣ, озод шуда наздаш бармегардӣ...
- Ин тасодуф аст, ман дигар Далер ҳастам, падару модарам кайҳо гузаштагӣ. Ятим ҳастам.
- Дурӯғ нагӯ, ман туро хуб мешиносам. Агар хоҳӣ, ҳозир рафта, туро аз хонаат меорам.
Телефон хомӯш шуд. Баргашта занг задам, "телефон абонента выключен, или находится не в зоне сети"...
Ҳамватанони азиз! Дастгир кардани ин ҷавон ягон мушкилот надорад, аммо қонунгузории ФР рӯ гардонидан аз волидонро гуноҳ ҳисоб намекунад. Буду боши ҷавон аз рӯи талаботи қонун, бо зани рус ҳамзистӣ дорад, зиндагиаш хуб мегузарад. Хабари дар озодӣ будани Далерро ба модараш ҳам нагуфтаам. Чӣ бояд кунам?...