У раённых судах Гомеля на гэтым тыдні праводзяцца 4 палітычна матываваныя працэсы
Як ужо паведамлялася, на бягучым тыдні ў судах Гомельскай вобласці адбываюцца 9 працэсаў, звязаных з палітычнай абстаноўкай. 8 з іх праходзяць у Гомелі: 4 – у абласным судзе і 4 – у раённых судах г. Гомеля.
Па дзве судовыя справы з палітычным адценнем прыпалі на суды Чыгуначнага і Савецкага раёнаў Гомеля.
24 кастрычніка ў судзе Чыгуначнага раёна падсудным быў грамадзянін Яўгеній Аляксеевіч Рагуцкі, абвінавачаны па частцы 1 артыкула 342 Крымінальнага кодэкса – «Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх». Разглядаў справу суддзя Крупадзёраў Мікалай Мікалаевіч.
У гэты ж дзень у судзе Савецкага раёна суддзя Мохараў Аляксандр Мікалаевіч вёў працэс па справе, у якой падсудным з’яўляўся Ілля Уладзіміравіч Міронаў, якога праваабаронцы прызналі палітзняволеным 6 кастрычніка 2021 года. Паколькі вынесены прыгавор – 1,5 гады пазбаўлення волі – грамадзянін ужо адбыў у СІЗА, ён быў вызвалены ў зале суда.
25 кастрычніка ў судзе Савецкага раёна той жа самы суддзя разглядаў справу, ў якой абвінавачаны Мікалай Мікалаевіч Кацура: «Абраза прадстаўніка улады» (арт. 369 КК) і «Дыскрэдытацыя Рэспублікі Беларусь» (арт. 369-1).
26 кастрычніка ў судзе Чыгуначнага раёна грамадзянін Дзмітрый Аляксандравіч Малашанка з’яўляўся падсудным таксама паводле артыкула 369-1, суддзя па справе – Шаршнёў Яўгеній Васільевіч.
Яшчэ адзін падобны працэс на бягучым тыдні адбываецца ў судзе Мазырскага раёна.
На цяперашні час у месцах зняволення ў Беларусі знаходзяцца 1346 чалавек, якіх праваабаронцы прызналі палітычнымі зняволенымі.
Нет комментариев