У Гомельскай вобласці праводзяць аператыўную мадэрнізацыю сістэмы апавяшчэння
У кожным рэгіёне Гомельскай вобласці з'явіцца прылада апавяшчэння, на якую можна будзе падаваць сігнал наўпрост з Менску. На новую сістэму збіраюцца выдаткаваць да 1,7 млн даляраў.
ТАА «Наватарпраект» па замове МНС праводзіць выбар праектнай арганізацыі па абʼекце: «мадэрнізацыя аўтаматызаванай сістэмы цэнтралізаванага апавяшчэння насельніцтва мясцовых узроўняў Гомельскай вобласці». Дазволы на правядзенне праектна-пошукавых работ у рэгіёнах былі прынятыя ўсімі раённымі выканаўчымі камітэтамі Гомельскай вобласці ў перыяд з 12 верасня па 24 кастрычніка 2022 года.
Праект прадугледжвае стварэнне цэнтралізаванай сістэмы па прамым канале сувязі паміж Упраўленнем МНС і прыладамі апавяшчэння ў рэгіёнах. Сістэма будзе ўключаць 207 прылад апавяшчэння па ўсёй вобласці (53 прылады маўленчага апавяшчэння і 154 сірэны). Рэгіянальная сістэма апавяшчэння будзе зʼяўляцца часткай агульнарэспубліканскай і мець магчымасць запуску ў аўтаматызаваным рэжыме з усіх вышэйшых узроўняў. З дапамогай сістэмы можна будзе апавяшчаць насельніцтва аб аварыі, стыхійным бедстве, пагрозе хімічнага або радыеактыўнага заражэння, а таксама аб паветранай трывозе.
Як паведамляюць дзяржаўныя СМІ, з 1 па 3 лістапада МНС на Гомельшчыне правядзе праверку электрасірэн.
У Гомелі будзе ўстаноўлена 6 прылад гучнага маўленчага апавяшчэння. Два апавяшчальнікі зʼявяцца на наяўных апорах на плошчы Леніна, яшчэ чатыры – на вуліцы Савецкай.
Агульны кошт будаўніцтва складае 4,2 млн рублёў (1,7 млн даляраў па бягучым курсе Нацбанка). Крыніцай фінансавання зʼяўляецца абласны бюджэт Гомельскай вобласці.
Нет комментариев