Билимсиз бирни йыгъар
Атам оьлюп, янгыз къалгъан къарт анам
Магъа айтды : «Охувунгну ташла, - деп –
Мен янгызман, техникумну къой, балам,
Сен бир ерде ишлемеге башла» - деп.
Амма бир къарт, бу таклифни эшитип,
Анабызгъа этди булай насигьат :
«Сонг гьёкюнме тюшмесин терс иш этип,
Билим якъдан ярлы болмакъ яман зат…
Бир буюргъан болур, кёмек этер эл,
Тек яшынгны охувундан къалдырма.
Къой, уланынг охув учун бувсун бел,
Болгъан чакъы герек билим алдырма.
Сен де, балам, билим алма алгъаса,
Мендейлеге ошамакълыкъ – хата ёл.
Билеги бар бирни йыгъып бажарса,
Билими бар мингни йыгъар» - деди ол.
Шарип Альбериев